އިލެކްޝަންސް ކޮމިޝަންގެ ކުރީގެ ރައީސް އަދި ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފް ވެރިކަންކުރާ މައި ޕާޓީ، އެމްޑީޕީއާއި ގުޅިވަޑައިގެންފިއެވެ. ޝަރީފް އެމްޑީޕީއާއި ގުޅިވަޑައިގަތީ މިދިޔަ ބުރާސްފަތި ދުވަހުއެވެ.
ޝަރީފް އެމްޑީޕީއާއި ގުޅިވަޑައިގެންނެވިކަން އެޕާޓީންވެސް ވަނީ ކަށަވަރުކޮށްދީފައެވެ. ޝަރީފް އެމްޑީޕީއާއި ގުޅިވަޑައިގަތުމަށް މުލިއާގޭގައި ބޭއްވި ބައްދަލުވުމުގައި އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވެވަޑައިގެންނެވިއެވެ. މީގެ އިތުރުން އެމްޑީޕީގެ ޕާލިމަންޓްރީ ގްރޫޕުގެ ލީޑަރު މުޙައްމަދު އަސްލަމްވެސް ބައިވެރިވެވަޑައިގެންނެވިއެވެ. ޝަރީފް އެމްޑީޕީއާއި ގުޅިވަޑައިގެން ސޮއިކުރެއްވި ފޯމާއި ހަވާލުވެވަޑައިގަތީ އެމްޑީޕީގެ ޗެއަރޕާސަންގެ ނާއިބު އަދި ބާރަށު ދާއިރާގެ މެންބަރު އަޙްމަދު ޢަބްދުﷲއެވެ.
ފެނަކަ ކޯޕަރޭޝަންގެ މެނޭޖިންގ ޑިރެކްޓަރުކަންވެސް ކުރައްވާފައިވާ ޝަރީފަކީ އިލެކްޝަންސް ކޮމިޝަނުގެ މެންބަރުކަމަށް ޢައްޔަންކުރެއްވުމުގެ ކުރިން ކުރީގެ ރައީސް ޔާމީންގެ އަރިސްބޭފުޅެއްގެ ގޮތުގައި ފެނިވަޑައިގެންނެވި ބޭފުޅެކެވެ. ނަމަވެސް ރިޔާސީ އިންތިޚާބާއި ގުޅިގެން އެމަނިކުފާނާމެދު އުފެދުނު ނުތަވަސްކަމާއި ޝަރީފަށް ކުރިމަތިވަޑައިގެންނެވި ގޮންޖެހުންތަކުގެ ސަބަބުން ރައީސް ޔާމީނާގެ އަރިހުގައި އެއްވެސް މަސައްކަތެއްކުރެއްމުގެ ވިސްނުންފުޅު ނުގެންގުޅޭކަމަށްވެސް ޝަރީފް ވިދާޅުވިއެވެ.
އިލެކްޝަންސް ކޮމިޝަންގެ މެންބަރުކަމުން ވަކިވެވަޑައިގެން ސްޓެލްކޯގެ މެނޭޖިންގ ޑިރެކްޓަރުކަމާއި ޝަރީފް ހަވާލުވެވަޑައިގަތީ މިއަހަރުގެ މާރިޗް މަހުގެ 1 ވަނަ ދުވަހުއެވެ.
އެމްޑީޕީއާއި ޝަރީފް ގުޅިވަޑައިގެންފައިވާއިރު، މިމަހުގެ 8 ވަނަ ދުވަހު ރައްޔިތުންގެ މަޖިލީހުގެ ކުރީގެ ނާއިބު ރައީސް އަދި އެމްޑީޕީގެ ކުރީގެ ޗެއަރޕާސަން މޫސާ މަނިކުވެސް ވަނީ އެޕާޓީއާއި ގުޅިވަޑައިގެންފައެވެ.
