ފިނި މޫސުމާ ދިމާކޮށް، ގައުމީ އެއާލައިން ‘މޯލްޑިވިއަން’ގެ އޮޕަރޭޝަންތަކަށް ގަތް ބޯޓުތައް ގެނައުން ލަސްވުމާ ގުޅިގެން ވަގުތީ ގޮތުން ބޭނުން ކުރާނެެ ބޯޓެއް ގެނެސްފިއެވެ.
އެ ކުންފުނިން ނެރުނު ނޫސްބަޔާނެއްގައި ބުނެފައި ވަނީ ނޮވެމްބަރި، ޑިސެމްބަރު އަދި ޖެނުއަރީ މަހުގެ ރާއްޖޭގެ ވައިގެ ދަތުރުތަކަށް އޮތް ޑިމާންޑް އިތުރުވެގެންދާނެތީ ކުރުމުއްދަތަކަށް އެއާކްރާފްޓެއް ގެނެސްފައިވާ ކަމަށެވެ.
އެ އާ ކްރާފްޓް ގެނައުމުގެ މަގްސަދަކީ ކުރިއަށް އޮތް ޗުއްޓީ ތެރޭގައި ދަތުރު ކުރަން ބޭނުންވާ ފަރާތްތަކަށް އެކަން މަގުފަހިކޮށް ދިނުން ކަމަށް ވެސް މޯލްޑިވިއަންއިން ބުނެއެވެ.
“ގެނެވުނު އެއާކްރާފްޓް އެޓީއާރު 600-72 އަކީ ދުނިޔޭގެ ބޮޑެތި ޑޮމެސްޓިކް އޮޕަރޭޝަންތަކުގައި މަގްބޫލް އެއާކްރާފްޓެއް. އެފަދަ އޮޕަރޭޝަންތަކުގައި އޭޓީއާރަށް ލިބިފައިވާ މަގްބޫލްކަމަށް ބަލާއިރު އޭޓީއާރުގެ ފިއުލް އެފިޝައިންސީ އަކީ ފާހަގަކޮށްލެވޭ ކަމެއް.” މޯލްޑިވިއަންއިން ބުނެ އެވެ.
