ކުރިއާ މެދުވެރިކޮށް ރާއްޖެއަށް އެތެރެކުރަން އުޅުނު ކެނެބިސްތަކެއް މޯލްޑިވްސް ކަސްޓަމަސް ސާވިސްއިން އަތުލައިގަނެފިއެވެ.
ކަސްޓަމްސްއިން ނެރުނު ބަޔާނެއްގައި ބުނެފައިވަނީ ކުރިއާ މެދުވެރިކޮށް ރާއްޖެއަށް އެމެރިކާއިން މި މަހުގެ 10 ވަނަ ދުވަހުގައި ގެނައި ޕާރިސަލެއް ބަލައިފާސްކުރުމުގެ ތެރޭގައި ޝައްކުވާ ޒާތުގެ ތަކެތި ހުރެގެން އިތުރަށް ބަލައިފާސްކުރި ކަމަށެވެ.
އިތުރަށް ބަލައިފާސްކުރުމުގެ ތެރެއިން އެ ޕާރިސަލުގެ ތެރެއިން މަސްތުވާތަކެތިކަމަށް ޝައްކުކުރެވޭ ތަކެތި ފެނި، އެތަކެތި ތަހުލީލުކުރުމުން އެ ތަކެތިވަނީ ކެނަބިސް ހާބަލްއަށް ޕޮޒިޓިވްވެފައިކަމަށް ކަސްޓަމްސްއިން ބުންޏެވެ.
ކަސްޓަމްސްއިން ބުނި ގޮތުގައި އަތުލައިގަނެވުނު ކެނަބިސްގެ ބަރުދަނުގައި ޖުމްލަ 459 ގުރާމު ހުންނާނެ ކަމަށެވެ. އަދި އެ ތަކެތީގެ މަގުމަތީގެ އަގު 367،000 (ތިންލައްކަ ފަސްދޮޅަސް ހަތްހާސް) ރުފިޔާއަށް އަރާކަމަށެވެ.
އަދި ކަސްޓަމްސްއިން ބުނި ގޮތުގައި މިއީ މި އަހަރުގެ މިހާތަނަށް މި ބާވަތުގެ މަސްތުވާތަކެތި ރާއްޖެއަށް އެތެރެކުރަން އުޅެނިކޮށް އަތުލައިގަނެވުނު ފަސްވަނަ ފަހަރެވެ. މި ފަސް ފަހަރުގެ މަތިން ޖުމްލަ 19.44 ކިލޯގެ ކެނެބިސް ހާބަލް ރާއްޖެއަށް އެތެރެކުރަން އުޅެނިކޮށް އަތުލައިގަނެފައިވެއެވެ.
އަތުލައިގަތް ކެނެބިސް މިހާރު ދިވެހި ފުލުހުންގެ ޚިދުމަތާ ހަވާލުކޮށްފައިވާކަމަށްވެސް ކަސްޓަމްސްގެ ބަޔާނުގައި ބުނެފައިވެއެވެ.
