ޔުނިޓީ ސްޕޯޓްސް އެކަޑެމީން ށ. ފުނަދޫ ސްކޫލްގައި ހެދި ރީޑީންގ ޕާކު ހުޅުވައިފިއެވެ.
ހަ ސަތޭކައެއްހާ ދަރިވަރުން ކިޔަވަމުން އަންނަ ފުނަދޫ ސްކޫލްގެ ގޯތިތެރޭގައި ހަދާފައިވާ ރީޑިން ޕާކް ހުޅުވައިދެއްވީ ށ. އަތޮޅު ކައުންސިލްގެ ރައީސް މުޙައްމަދު ޝިޔާމް (ޝިޔާންޓޭ) އެވެ.
މި ރަސްމިއްޔާތުގައި ޔުނިޓީ ސްޕޯޓްސް އެކަޑެމީގެ ހޭންޑްބޯލް ޓީމުން ވަނީ އެ ޕާކަށް ފޮތް ހަދިޔާ ކޮށްފައެވެ.
ކައުންސިލްގެ ގްރާންޓްގެ ދަށުން 75،000 ރުފިޔާ ހަމަޖައްސައިދީފައިވީ ނަމަވެސް އެ މަސައްކަތް ނިމުންއިރު 98،000 ރުފިޔާ ހަރަދު ކޮށްގެން ނިމުނު މި ޕާކް 6 މަސްވަންދެން އެ އެކަޑަމީން މަރާމަތުކޮށް ބަހައްޓާނެއެވެ.
މިއީ އަތޮޅު ކައުންސިލުން އެންޖީއޯސްތަކަށް ކޮމިއުނިޓީ ޕްރޮގުރާމް ހިންގުމަށް ހުޅުވާލި ފުރުސަތުގެ ބޭނުން ހިފައި، ތަރައްގީކުރި ރީޑިން ޕާކެކެވެ. އެ ޕްރޮގުރާމަށް ތިން ޖަމިއްޔާއަކުން ކުރިމަތިލިއިރު އެ ޕްރޮޕޯސަލް ކާމިޔާބުކުރީ ޔުނިޓީ ސްޕޯޓްސް އެކަޑަމީންނެވެ.
ޔުނިޓީ ސްޕޯޓްސް އެކަޑެމީއަކީ ފުނަދޫގެ ތަރައްގީއަށް ގިނަ ހިދުމަތްތަކެއް ކުރަމުން އަންނަ ސްޕޯޓްސް އެކަޑެމީއެކެވެ. އެ އެކަޑެމީން މިހާރުވެސް 16 އަހަރުން ދަށުގެ 170 ކުދިންނަށް ފުޓްބޯޅަ ޓްރެއިނިންގ ހިންގާއިރު މި މަހުން ވަނީ 20 ކުޅުންތެރިންގެ ސީނިއާ ހޭންޑްބޯލް ޓީމެއްގެ ޓްރެއިނިންގ ވެސް ފަށާފައެވެ. ޔުނިޓީ ސްޕޯޓްސް އެކަޑަމީ ވުޖޫދަށް އައިސްފައި ވަނީ 24 ނޮވެމްބާރ 2020 ވަނަ ދުވަހުއެވެ.
