ރާއްޖޭގައި މިވަގުތު 22 މީހުން އެޗްއައިވީއަށް ޕޮޒިޓިވް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފި އެވެ.
މިއަދު ފާހަގަކުރަމުންދާ އޭޑްސް ބައްޔާއި ދެކޮޅަށް މަސައްކަތް ކުރާ ދުވަހާއި ގުޅިގެން އެވްޕީއޭއިން ނެރުނު ބަޔާނެއްގައި ބުނެފައި ވަނީ މި ދުވަސް ފާހަގަކުރުމުގެ މަގްސަދަކީ އޭޑްސް ބަލީގެ ނުރައްކަލުން ދިވެހި މުޖުތަމައު ސަލާމަތްކުރުމުގެ ގޮތުން ހޭލުންތެރިކަން އިތުރުކުރުން ކަމަށެވެ. އަދި ބަލި ފެތުރުމަށް މަގުފަހިވާފަދަ އާދަތަކާއި ދުރުހެލިވުމަށް އެހީތެރިވެދިނުން ކަމަށެވެ.
މި އަހަރުގެ އޭޑްސް ދުވަހުގެ ޝިއާރަކީ ” އެޗްއައިވީއިން ރައްކާތެރިވުމަށްޓަކައި ގަވައިދުން ޓެސްޓް ކުރަން އާދަކުރަމާ” މި އެވެ.
އެޗްޕީއޭއިން ބުނީ ރާއްޖޭގައި އެންމެ ފުރަތަމަ އެޗްއައިވީ ފެނިފައިވަނީ 1991 ވަނަ އަހަރުގައި ކަމަށެވެ. ތަފާސް ހިސާބުތަކަށް ބަލާއިރު މިދިޔަ އަހަރުގެ ނިޔަލަށް އެބަލި ޖެހުނު މީހުންގެ އަދަދު ވަނީ 39 އަށް އަރާފައި ކަމަށެވެ. އޭގެތެރޭގައި ހިމެނެނީ ހަ އަންހެނުންނާއި 33 ފިރިހެނުންނެވެ.
މިހާތަނަށް އެ ބަލީގައި 15 މީހަކު މަރުވެފައިވާއިރު މި ވަގުތު އެއިޑްސް އަށް ރާއްޖޭގައި 22 މީހަކު ފަރުވާ ހޯދަމުންދާ ކަމަށް އެޗްޕީއޭއިން ބުނެ އެވެ.
އޭޑްސް އަށް ހޭލުންތެރިކުރުމާއި ބަލިން ރައްކާތެރިކުރުމަށް ކުރަންޖެހޭ ކަންކަން ގައުމީ ފެންވަރުގައި ރާވާ ހިންގުމާއި އެ ބަލި ޖެހިފައިވާ މީހުންގެ ފަރުވާގެ ކަންކަން ކުރިއަށް ގެންދަނީ ނެޝަނަލް އޭޑްސް ޕްރޮގްރާމްގެ ދަށުން ކަމަށް އެޗްޕީއޭއިން ބުނެ އެވެ.
