ގައުމީ އެއާލައިން މޯލްޑިވިއަން އިން އެކްސެސް ބެގޭޖަށް ނަގާ ފީ ބޮޑުކޮށްފި އެވެ.
މޯލްޑިވިއަން އިން މިއަދު ކުރި އިއުލާނެއްގައި ބުނީ މި ޑިސެމްބަރު މަހުގެ 7 ވަނަ ދުވަހުން ފެށިގެން އިތުރުވާ ކޮންމެ ކިލޯއަކަށް 3.11 ޑޮލަރު ނެގުމަށް ނިންމާފައިވާ ކަމަށެވެ.
އެގޮތުން މާވަރުލު އެއާޕޯޓާއި، ކޫއްޑޫ އެއާޕޯޓް އަދި ކާޑެއްދޫ އެއާޕޯޓަށް މޯލްޑިވިއަން އިން ކުރާ ދަތުރުތަކުގައި މިއަދަދަށް ފައިސާ ނަގާނެ ކަމަށް މޯލްޑިވިއަން އިން ވަނީ ބުނެފައެވެ.
މޯލްޑިވިއަން އިން ބުނީ މިގޮތަށް ނިންމީ ސަރުކާރުން ޓީޖީއެސްޓީ ބޮޑު ކުރުމާ ގުޅިގެން ކަމަށެވެ.
ސަރުކާރުން ހުށަހަޅައި ރައްޔިތުންގެ މަޖިލީހުންވަނީ ރައްޔިތުން އަތުން ނަގާ ޖީއެސްޓީ 6 ޕަސެންޓުން 8 ޕަސެންޓަށް ބޮޑު ކުރުމަށް ނިންމައިފައެވެ.
އަދި ފަތުރުވެރިންގެ އަތުން ނަގާ ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑު ކުރަން ފާސްކޮށްފައެވެ.
