ޓެރަރިޒަމް އާއި ސްކޭމް ކުރުމަށް މަގުފަހިވާ އަމަލުތަކެއް ހިންގާ ކަމުގެ ތުހުމަތުގައި ސަލާމަތީ ބާރުތަކުން ކ. މާފުށީ ޖަލުގައި ހިންގި އޮޕަރޭޝަން ނިންމާލައިފި އެވެ.
މާފުށި ޖަލުގައި ހާއްސަ އޮޕަރޭޝަނެއް ކުރިއަށް ގެންގޮސްފައިވަނީ ދިވެހި ފުލުހުންގެ ހިދުމަތާއި މޯލްޑިވްސް ނެޝަނަލް ޑިފެންސް ފޯސް އަދި މޯލްޑިވްސް ކަރެކްޝަން ސަރވިސް ގުޅިގެންނެވެ.
މި އޮޕަރޭޝަން ފަށާފައިވަނީ އަންގާރަ ދުވަހުގެ ރޭގެ ވަގުތެއްގައެވެ. ކަރެކްޝަނަލް ސާވިސް އިން ބުނި ގޮތުގައި އޮޕަރޭޝަން ފެށީ ޖަލަށް މަނާ ތަކެތި ވައްދައިގެން ސްކޭމް ކުރުމާއި ޓެރަރިޒަމަށް މަގުފަހިވާ އަމަލުތައް ހިންގާ ކަމަށް ލިބުނު މައުލޫމާތަކާ ގުޅިގެންނެވެ.
ކަރެކްޝަންސްގެ އޮފިޝަލަކު ވިދާޅުވީ ރޭ މެންދަމު 12 ޖެހި އިރު އޮޕަރޭޝަން ކާމިޔާބު ކަމާ އެއްކޮށް އެއްވެސް ހަމަ ނުޖެހުމެއް ނެތި ނިންމާލާފައިވާ ކަމަށެވެ.
އޮޕަރޭޝަންގެ ތެރޭގައި ފޯން، ސިމް ކާޑު އަދި މަސްތުވާތަކެތި ކަމަށް ޝައްކު ކުރެވޭ ތަކެތި ފަދަ މަނާ ތަކެތި ވަނީ ހޯދާފައި ކަމަށް އޮފިޝަލް ވިދާޅުވިއެވެ.
