އޭޑީކޭ ހޮސްޕިޓަލުގެ ހިދުމަތްތަކުގެ އަގު ބޮޑުކުރަން ނިންމައިފި އެވެ.
އޭޑީކޭ އިން ނެރުނު ބަޔާނެއްގައި ބުނީ 2020 ވަނަ އަހަރުން ފެށިގެން ދުނިޔޭގެ އިގްތިސާދަށް ކުރިމަތިވި ހީނަރުކަމާ ގުޅިގެން އިންފްލޭޝަން ރޭޓު މަތިވެ، މުދަލާއި ހިދުމަތުގެ އަގުތައް ރާއްޖެއާއި ރާއްޖެއިން ބޭރުގައި ބޮޑުވެފައިވާ ކަމަށެވެ.
އެގޮތުން އޭޑީކޭ ހޮސްޕިޓަލުގެ ހިންގުމުގެ ހަރަދުތައް ވެސް އެތައް ގުނައަކުން ބޮޑުވެެފައިވާ ކަމަށް އެ ހޮސްޕިޓަލުން ބުނެ އެވެ. އޭގެ ސަބަބުން ދެމެހެއްޓެނިވި ގޮތެއްގައި ހިދުމަތް ފޯރުކޮށްދިނުމަށްޓަކައި އެ ހޮސްޕިޓަލުން ދެމުންގެންދާ ހިދުމަތްތަކުގެ އަގުތައް މި މަހުގެ 15 އިން ފެށިގެން ބޮޑު ކުރުމަށް ނިންމާފައިވާ ކަމަށް ބުނެފައިވެ އެވެ.
އެހޮސްޕިޓަލުން އިތުރަށް ބުނީ ވީހާވެސް ލުއި ގޮތަކަށް މި ބަދަލުތައް ގެނައުމުގެ ގޮތުން ހޮސްޕިޓަލުން ދޭ ޚިދުމަތްތަކުގެ އަގުތަކަށް ބަދަލު ގެނައުމުގެ ނިންމާފައިވަނީ މަރުހަލާތަކަކަށް ބަހާލައިގެން ކަމަށެވެ.
އަދި އަގުތަކަށް އައި ބަދަލު އެ ހޮސްޕިޓަލްގެ ކައުންޓަރުތަކުން ލިބޭނެ ކަމަށްވެސް އެބަޔާނުގައި ބުނެފައި ވެއެވެ.
