ވޯލްޑް ކަޕް އާންމުންނަށް ދެއްކުމަށް އެންމެ ބޮޑު ލެޑް ޕެނަލްއާއެކު ކުރިއަށް ގެންދާ ބޯޅަ ފޯރީގެ ފައިނަލް މެޗު ބަލަންދާ ފަރާތްތަކަށް އަގުހުރި ހަދިޔާތަކެއް ދޭން އެޗްޑީސީން ނިންމައިފި އެވެ.
އެޗްޑީސީ އާއި މީޑިއާ ނެޓާ ގުޅިގެން މެޗް ބަލަންދާ ފަރާތްތަކުގެ މެދުގައި ގުރުއަތުން ހޮވޭ ފަސް ފަރާތަކަށް 5،000 ރުފިޔާ ދިނުމަށް ވަނީ ހަމަޖެހިފަ އެވެ.
ގަތަރުގައި ކުރިޔަށްދާ ފީފާ ވޯލްޑް ކަޕް މެޗުތައް ހުޅުމާލޭގައި ދެއްކުމުގެ ގޮތުން “ބޯޅަފޯރި”ގެ ނަމުގައި އެޗްޑީސީން ވަނީ ހުޅުމާލޭގެ ދެ ސަރަހައްދެއްގައި ބޮޑު ސްކްރީން ބަހައްޓާފަ އެވެ.
ހުޅުމާލެ ދެ ސަރަހައްދެއްގައި އެޗްޑީސީން ވަނީ 20 ފޫޓު 40 ފޫޓުގެ ބޮޑު ސްކްރީނުގައި ވޯލްޑް ކަޕް ބެލުމުގެ އިންތިޒާމް ހަމަޖައްސާފަ އެވެ. އެގޮތުން ހުޅުމާލެ ސިންތެޓިކް ޓްރެކާއި ހުޅުމާލެ ފޭސް 2 ހިޔާ ސަރަހައްދުގައި ބޮޑު ސްކްރީނުން މެޗުތައް އެޅުވުން ކޮންމެ ދުވަހަކު ވެސް ކުރިޔަށްދެ އެވެ.
އެޗްޑީސީން ވަނީ ވޯލްޑް ކަޕް ނިމެންދެން މިފަދަ ގިނަ ހަރަކާތްތައް އެކި ދުވަސްތަކުގެ މަތިން ކުރިޔަށް ގެންދިޔުމަށް ނިންމާފަ އެވެ.
