ދައުލަތާއި ދަޢުވާލިބޭ ފަރާތުގެ ވަކީލުންނަށް ލެޕްޓޮޕާއި ޓެބްލެޓާއި، ސްމާޓް ފޯން ޝަރީޢަތުގެ މަޖިލީހަށް ވެއްދުމުގެ ފުރުސަތު ދިނުމަށް ކްރިމިނަލް ކޯޓުން ނިންމައިފިއެވެ.
ކްރިމިނަލް ކޯޓުން އާންމުކުރި ބަޔާނެއްގައި ބުނެފައިވަނީ، ކޮވިޑް-19 އާ ގުޅިގެން ދިވެހިރާއްޖޭގައި ޢާންމު ސިއްޙަތުގެ ކުއްލި ނުރައްކަލުގެ ހާލަތު އިޢުލާނުކޮށްފައިވުމާއެކު، މިބަލި ފެތުރުން މަދުކުރުމުގެ ގޮތުން އަތުންއަތަށް ބަދަލުކުރެވޭ ލިޔެކިޔުންތައް ވީހާވެސް މަދުކުރުމަށްޓަކައި، ޕްރޮސިކިއުޓަރ ޖެނެރަލްގެ ފަރާތުން އެކޯޓަށް އިލެކްޓްރޯނިކް ޒަރިއްޔާއިން މައްސަލަ ހުށަހެޅުމުގެ އިންތިޒާމުތައް ހަމަޖައްސާފައިވާކަމަށެވެ.
އަދި ކޯޓަށް ހުށަހަޅާ މައްސަލަތަކުގެ ލިޔުންތައް އީމެއިލްގެ ޒަރިއްޔާއިން ދަޢުވާލިބޭ ފަރާތްތަކަށް ފޮނުވަމުންދާކަމަށެވެ.
އެހެންކަމުން ކޯޓަށް ހާޒިރުވާ ވަކީލުންނަށްވެސް މައްސަލަތަކުގެ ލިޔެކިޔުންތަކުގެ ކަރުދާސް ކޯޓަށް ގެނައުމުގެ ބަދަލުގައި، އެ ލިޔެކިޔުމުގެ ޑިޖިޓަލް ކޮޕީ ބޭނުންކުރުމުގެ ފުރުސަތު ދިނުމަށް އެކޯޓުން ނިންމާފައިވާކަމަށް ކްރިމިނަލް ކޯޓުގެ ބަޔާނުގައި ބުނެފައި ވެއެވެ.
ކްރިމިނަލް ކޯޓުން ބުނީ، އަޑުއެހުންތަކުގެ ތާވަލު ހަމަޖައްސަން ވަކީލުންނާ މަޝްވަރާކުރާއިރު ފޯނާއި ލެޕްޓޮޕް ފަދަ ވަސީލަތްތައް ނުވެއްދޭތީ ތާވަލު ބަލަން ވަކީލުންނަށް ދަތިވާކަމަށެވެ. އަދި އެގޮތަށް ތާވަލު ބަލަން ވަކީލުންނަށް ފުރުސަތު ދޭން އަޑުއެހުން މެދުކަނޑާލަން ޖެހި ކޯޓުގެ ވަގުތުތައް ގެއްލޭ ކަމަށެވެ. ލެޕްޓޮޕާއި ފޯނާއި ޓެބްލެޓު ފަދަ ތަކެތި ވައްދަން ހުއްދަ ދިނީ މި ކަމަށް ހައްލެއް ހޯދުމުގެ ގޮތުންކަމަށް އެ ކޯޓުން ބުންޏެވެ.
ލެޕްޓޮޕާއި، ފޯނާއި، ޓެބްލެޓް ފަދަ ތަކެތި ކޯޓުރޫމަށް ވެއްދުމުގެ ފުރުސަތު ދިން ނަމަވެސް އެ ތަކެތިން އޯޑިއޯ ރެކޯޑު ކުރުމާއި ވީޑިއޯ އަދި ފޮޓޯ ނެގުން މަނާ ވާނެ ކަމަށް ކްރިމިނަލް ކޯޓުގެ ބަޔާނުގައިވެ އެވެ. އަދި އެފަދަކަމެއް ކޮށްފިނަމަ ފިޔަވަޅުއެޅުމުގެ އިހްތިޔާރު ފަނޑިޔާރަށް ލިބިގެންވާ ކަމަށްވެސް އެކޯޓުން ބުނެއެވެ.
