ފެނަކަ ކުންފުނީގެ ސްމާޓް މީޓަރުގެ ހިދުމަތް ތައާރަފްކޮށްފި އެވެ.
މި ހިދުމަތް ތައާރަފްކުރީ މިއަދު މާމެންދޫގައި އިމާރާތް ކުރި އާ އިންޖީނުގެ އާއި އޮފީސް އިމާރާތް ހުޅުވުމުގެ ރަސްމިއްޔާތުގެ ތެރެއިންނެވެ. އެގޮތުން ހިދުމަތް ރަސްމީކޮށް އިފްތިތާހްކޮށްދެއްވީ ރާއްޖޭގެ ރައީސުލްޖުމްހުރިއްޔާ އިބްރާހިމް މުހައްމަދު ސޯލިހްއެވެ.
މި ހިދުމަތަކީ ރިއަލް ޓައިމްގައި ކަރަންޓް ބޭނުން ކުރެވެމުންދާ ގޮތާއި އޭގެ ތަފްސީލު މިނެޓުން މިނެޓަށް މިން ކުރެވި ފެންނަން ހުންނާނެ ޓެކްނޮލޮޖީއެއް ކަމަށް ފެނަކައިން ވަނީ ބުނެފައެވެ.
މި ހިދުމަތް މެދުވެރިކޮށް މޮބައިލް ފޯނުން އިތުރު ތަފްސީލުތައް ފަސޭހަކަމާއެކު ބަލާލެވޭނެ އިންތިޒާމު ހަމަޖެހިފައިވާނެ ކަމަށާއި އޭގެ ސަބަބުން އެމީހަކު ބޭނުންވާ މިންވަރެއްގައި ކަރަންޓް ބޭނުން ކުރެވޭ މިންވަރު އިހުތިޔާރު ކުރުމުގެ ފުރުސަތު ލިބި، ކަރަންޓް އިސްރާފު ކުރުން މަދު ކުރެވޭނެ ކަމަށް ފެނަކަ އިން ވަނީ ބުނެފައެވެ.
ސްމާޓް މީޓަަރު މެދުވެރިކޮށް ބޭނުންވާ ތަފްސީލުތައް ހިދުމަތްދޭ ފަރާތުގެ ސިސްޓަމްތަކުގައި ވަގުތުން ވަގުތަށް ރެކޯޑް ވަމުންދާއިރު ކަސްޓަމަރަކަށް ބިލު ކުރުމުގައި އަތުވެދާނެ ކަންބޮޑުވުމެއްގެ އިރުޝާދު ދުރާލާ ކުންފުނީގެ ފަރާތުން ދެވޭނެ ކަމަށްވެސް ފެނަކަ އިން ބުނެ އެވެ.
އެކުންފުނިން ބުނި ގޮތުގައި ފެނަކައިގެ އަމާޒަކީ ރާއްޖެއަށް ޕްރީފެއިޑް ކަރަންޓް މީޓަރުތައް ހަރުކޮށް، އެ ހިދުމަތް ވެސް ދިނުމެވެ.
