ނިޝާމާ މަރާލާފައިވަނީ ކަރުގައި އެއްޗެއް އަޅައި ނޭވާ ހާސްކޮށްގެން ކަމަށް ފުލުހުން ބުނެފި އެވެ.
އުމުރުން 28 އަހަރުގެ ނިޝާމާގެ ހަށިގަނޑު ޕޯސްޓްމޯޓަމް ހަދާފައިވަނީ އިންޑިއާއިން ނެވެ. އަދި ޕޯސްޓްމޯޓަމްއަށް ފަހު، އޭނާގެ ހަށިގަނޑު މާލެ ގެނެސްފައިވަނީ އިއްޔެ އެވެ.
ފުލުހުން ރޭ މީޑިއާތަކަށް މަޢުލޫމާތު ދެމުން ބުނެފައިވަނީ ޕޯސްޓްމޯޓަމްގެ ވަގުތީ ރިޕޯޓު ލިބިފައިވާކަމަށާއި ނިޝާމާ މަރާލާފައިވަނީ ކަރުގައި އެއްޗެއް އަޅައި ނޭވާ ހާސްކޮށްލައިގެން ކަމަށެވެ.
ނިޝާމާ މަރާލި ގޮތް ބުނުން ފިޔަވާ ޕޯސްޓްމޯޓަމް ރިޕޯޓްގައިވާ އެއްވެސް މައުލޫމާތެއް ފުލުހުން ހާމަކޮށްފައެއް ނުވެ އެވެ.
ހދ. ނޮޅިވަރަން ހިތަށްފިނިވާގެ އުމުރުން 28 އަހަރުގެ ނިޝާމާ މުޙައްމަދު މަރުވެފައި އޮއްވާ ފެނުނީ މިމަހުގެ 10 ވަނަ ދުވަހު އޭނާ ދިރިއުޅުނު ގޭގެ ކޮޓަރި ތެރެއިންނެވެ. މި މައްސަލައިގައި ފުލުހުން ތުޙުމަތު ކުރަނީ ނިޝާމާގެ ފިރިމީހާ ފައިޞަލް ޢަލީއަށެވެ.
އެކަމުގެ ތުޙުމަތުގައި އޭނާ ހައްޔަރުކޮށްފައި ހުއްޓާ އަމިއްލައަށް މަރުވާން މަސައްކަތްކުރުމުން، ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދެމުންދަނިކޮށް މިމަހުގެ 19 ވަނަ ދުވަހު ވަނީ މަރުވެފައެވެ.
