އަންނަ އަހަރު ބާއްވާ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަކުރާނެ ކެންޑިޑޭޓަކު ހޮވުމަށް އަންނަ ޖެނުއަރީ މަހުގެ 28 ވަނަ ދުވަހު ބާއްވަން ހަމަޖެހިފައިވާ އެ ޕާޓީގެ ރިޔާސީ ޕްރައިމަރީގައި ވޯޓުލުމުގެ ހައްގު ލިބިފައިވާ މީހުންގެ ނަންތައް އާއްމުކޮށްފިއެވެ.
އިއްޔެ އާއްމު ކުރި ލިސްޓުގައިވާ ގޮތުން ރިޔާސީ ޕްރައިމަރީގައި 87 ދާއިރާއަކުން 57،714 މީހުންނަށް ވޯޓު ލެވޭނެއެވެ. ވޯޓު ލުމުގެ ހައްގު ލިބިފައިވާ މީހުންގެ ލިސްޓާއެކު ޝަކުވާ ހުށަހެޅުމުގެ ފުރުސަތުވެސް އިއްޔެ ވަނީ ހުޅުވާލައިފައެވެ.
އެމްޑީޕީން ބުނީ ވޯޓާސް ލިސްޓަށް ޝަކުވާ ހުށަހެޅޭނީ އޮންލައިންކޮށް ކަމަށާއި އެ ފުރުސަތު އަންނަ ޖެނުއަރީ މަހުގެ އެއްވަނަ ދުވަހުގެ 4:00 އާ ހަމައަށް އޮންނާނެ ކަމަށެވެ.
އެމްޑީޕީގެ ރިޔާސީ ޕްރައިމަރީއަށް ކުރިމަތި ލައްވާފައިވަނީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ރައީސުލްޖުމްހޫރިއްޔާ އަދި އެ ޕާޓީގެ އެންމެ އިސް ލީޑަރު އިބްރާހިމް މުހައްމަދު ސޯލިހެވެ.
