ފުވައްމުލައް ސިޓީގައި ތަރައްގީގެ މަޝްރޫއެއް ނުހިންގައޭ ބުނުމަކީ ޖޯކެއް ކަމަށް ވިދާޅުވެ، ރައީސް އިބްރާހީމް މުހައްމަދު ސޯލިހު ކުރީގެ ރައީސް މުހައްމަދު ނަޝީދަށް ވަރަށް ބޮޑަށް ފާޑުވިދާޅުވެއްޖެ އެވެ.
ދާދިފަހުން ފުވައްމުލަކަށް ކުރެއްވި ކެމްޕެއިން ދަތުރުފުޅެއްގައި ނަޝީދު ވިދާޅުވީ ރިޔާސީ އިންތިހާބާއި މަޖިލީސް އިންތިހާބުގައި ފުވައްމުލަކުގެ މެޖޯރިޓީ އެމްޑީޕީއަށް ދިންނަމަވެސް ވޯޓުދިން މިންވަރާ ގާތަށް ވެސް އެ ސިޓީއަށް ކަމެއްކޮށްދެވިފައިނުވާ ކަމަށެވެ.
ރޭ މާލޭގައި ބޭއްވި ރައީސް ސޯލިހުގެ ކެމްޕެއިން ޖަލްސާގައި އެމަނިކުފާނު ވަނީ ނަޝީދުގެ އެ ވާހަކަފުޅަށް ރައްދު ދެއްވާފަ އެވެ. އެމަނިކުފާނު ވިދާޅުވީ ފުވައްމުލަކުގައި ތަރައްގީގެ މަޝްރޫއެއް ނުހިންގައޭ ބުނުމަކީ ޖޯކެއް ކަމަށެވެ.
ފުވައްމުލަކުގެ މަޝްރޫއުތަކަށް އެކަނި 786 މިލިއަން ރުފިޔާ ހަމަޖައްސައި އެ ފައިސާގެ ތެރެއިން 436 މިލިއަން ރުފިޔާ އެކި މަޝްރޫއުތަކަށް ހަރަދުކުރެވިފައިވާ ކަމަށް ރައީސް ވިދާޅުވި އެވެ.
