އެމްއެމްއޭއިން ބޭންކުތަކަށް ފޯރުކޮށްދޭ ޑޮލަރުގެ އަދަދު މަދުކުރުމާ ގުޅިގެން ރާއްޖެއިން ބޭރުގައި ކިޔަވަން ތިބޭ ދަރިވަރުންނަށް ފައިސާ ފޮނުވުން ނުވަތަ ޓީޓީ ހެދުމުގެ އުސޫލު ބޭންކުތަކުން ހަރުކަށިކޮށްފިއެވެ. މި އުސޫލު ހަރުކަށިކޮށްފައިވަނީ މިމަހުގެ 1 ވަނަ ދުވަހުން ފެށިގެންނެވެ.
މި ބަދަލާއި ގުޅިގެން ބީއެމްއެލްއިންވެސް ވަނީ ރާއްޖެއިން ބޭރުގައި ކިޔަވާ ދަރިވަރުންނަށް ފައިސާ ފޮނުވުން ލިމިޓްކޮށްފައެވެ. އެގޮތުން ބީއެމްއެލްއިން ބުނެފައިވަނީ މި މަހުގެ އެއްވަނަ ދުވަހުން ފެށިގެން ޓިއުޝަން ފީ އާއި ލިވިން އެލަވަންސަށް ވާ ޑޮލަރު ދޫކުރާނީ ހަމައެކަނި އޭ ލެވަލް އިން މަތީގެ ޓާޝަރީ ފުލްޓައިމް ދަރިވަރުންނަށާއި، އޭވިއޭޝަން، ލޯ އަދި މެޑިސިން ފަދަ ޕްރޮފެޝަނަލް ދާއިރާތަކުގެ ދަރިވަރުންނަށް ކަމަށެވެ.
މިކަމާއި ގުޅިގެން އެމްއެމްއޭއިން ބުނެފައިވަނީ ރާއްޖެއިން ބޭރުގައި މަތީ ތައުލީމު ހާސިލްކުރަމުންދާ ދިވެހި ދަރިވަރުންނަށް މިހާރުވެސް ބޭންކުތައް މެދުވެރިކޮށް އެމްއެމްއޭއިން ޑޮލަރު ފޯރުކޮށްދެމުންދާކަމަށެވެ. ވަކިވަކި ބޭންކުތަކުން ބޭނުންވާނަމަ އެ ބޭންކުތަކުގެ ކަސްޓަމަރުންނަށް ޑޮލަރު ފޯރުކޮށްދިނުމުގެ ފުރުސަތު އެ ބޭންކުތަކަށް އަބަދުވެސް އޮންނާނެކަމަށްވެސް އެމްއެމްއޭއިންވަނީ ހާމަކޮށްފައެވެ.
