ރައީސް ސޯލިހުގެ ދަތުރާ ދިމާކޮށް، ރައީސް ޔާމިން މިނިވަން ކުރަން ގޮވާލާ ހަނިމާދޫގައި މުޒާހަރާކޮށްފިއެވެ.
ރައީސް ސޯލިހު ހއ އަދި ހދ އަށް ކުރައްވާ ކެންޕޭން ދަތުރުގެ ތެރެއިން މިއަދު ހަވީރު ހަނިމާދޫއަށް ވަޑައިގަތުމަށް ހަމަޖެހި އެކަން އިއުލާން ކުރުމުން އެވަގުތަށް އިދިކޮޅުން އެއްވުމެއް ރޭވިއެވެ. ނަމަވެސް ރައީސް ވަޑައިގަތުން ފަސްކުރުމުން އެއެއްވުން ވަނީ ހިނގާލުމަކަށް ބަދަލު ކޮށްފައެވެ.
ހިނގާލުން ކުރިޔަށް ގެންދިޔައީ ހަނިމާދޫ ބަނދަރުން، އަމިނީމަގުން އިރަށްގޮސް ރަންވޭމަގުން ދެކުނަށްގޮސް ބޮޑުތަކުރުފާނުމަގު ހުނޅަގަށްގޮސް ބަނދަރަށެވެ.
މި ހިނގާލުމުގެ އިތުރުން ރައީސް އިބުރާހިމް މުހައްމަދު ސޯލިހު ހަނިމާދޫއަށް ވަޑައިގަތުމުން ރައީސް ހުންނެވި ގެސްޓު ހައުސް ކައިރީ އިދިކޮޅުން ވަނީ އަޑު އުފުލާފައެވެ. އެ އަޑު އުފުލުމުގައި ރައީސް ޔާމިން މިނިވަން ކުރުމަށާއި ރައީސް ސޯލިހު އިސްތިއުފާއަށް ގޮވާލާފައިވެއެވެ.
