ބޭންކް އޮފް މޯލްޑިވްސް ގެ 40 ވަނަ އަހަރީ ދުވަހާ ގުޅުވައިގެން ހިންގުނު މުޖުތަމައަށް ފައިދާ ހުރި މުހިންމު 12 ހަރަކާތުގެ ތެރެއިން ތައާރަފް ކުރި ސްޕޯޓްސް ސްކޮލާޝިޕް ލިބޭ އެތުލީޓުން ހޮވައިފިއެވެ.
މި ސްކޮލާޝިޕް ހުޅުވާލެވުނީ އެތުލީޓުންގެ ހުނަރު ކުރިއަރުވައި، ކުޅިވަރުގައި ފުރިހަމަ ކާމިޔާބީއެއް ހޯދުމުގައި އެހީތެރިވުމުގެ ގޮތުންނެވެ. މި ޕްރޮގްރާމުގެ ދަށުން ރާއްޖޭގެ މޮޅު އެތުލީޓުންނަށް ހުރިހާ ހަރަދަކާއެކު ރާއްޖޭން ބޭރުގެ ހައި ޕަރފޯމަންސް ޓްރެއިނިންގ ސެންޓަރުތަކުގައި ތަމްރީން ހޯދުމުގެ ފުރުސަތު ފޯރުކޮށްދެވިގެންދާނެއެވެ.
ސްކޮލާޝިޕް އަށް ހޮވުނު އެތުލީޓުން އިއުލާންކުރަން މިއަދު ހެނދުނު މާލެ ޓޭބަލް ޓެނިސް ހޯލުގައި ކުރިޔަށް ދިޔަ ހަފްލާގައި އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު އާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ކާލް ސްޓުމެކްގެ އިތުރުން މޯލްޑިވްސް އޮލިމްޕިކް ކޮމިޓީ އަދި ގައުމީ ކުޅިވަރު އެސޯސިއޭޝަންގެ އޮފިޝަލުން ބައިވެރިވެފަވެއެވެ.
ބީއެމްއެލް ސްޕޯޓްސް ސްކޮލާޝިޕް ލިބޭ އެތުލީޓުންނަކީ:
- މަރިޔަމް ރޫޔާ އަލީ (އެތްލެޓިކްސް)
- މުހައްމަދު މިންހާލް ޝާމިން (އެތްލެޓިކްސް)
- މުހައްމަދު ސާލިމް އަބްދުލް ސަމަދު (ބެޑްމިންޓަން)
- ޝުބާ މުހައްމަދު ޝަރީފް (ބެޑްމިންޓަން)
- ފާތިމަތު ޖުމާނާ ނިމާލް (ޓޭބަލް ޓެނިސް)
- މޫސާ މުންސިފް އަހްމަދު (ޓޭބަލް ޓެނިސް)
- ލަޔާން މުހައްމަދު ޝާމިން (ޓެނިސް)
މި ކުޅުންތެރިންގެ ޓްރެއިނިންތައް ކުރިއަށް ދިއުމަށް ހަމަޖެހިފައިވަނީ، ކުޅިވަރުގެ ދާއިރާއިން މަޝްހޫރު ބައެއް ބޭރުގައުމުތަކުގެ ސްޓޭޑިއަމްތައް ކަމަށްވާ ކިންގްސްޓަން ޖަމައިކާ، ޑުބާއީ ޔުނައިޓެޑް އަރަބް އެމިރޭޓްސް ބެޑްމިންޓަން، ޒަގްރިބް ކްރޯޝިއާގެ އިތުރުން ބާސެލޯނާ ސްޕެއިންއަށް ކަމަށް ބީއެމްއެލް އިން މައުލޫމާތު ފޯރު ކޮށްދެއެވެ.
މި ސްކޮލާޝިޕް އަށް ހުޅުވާލެވިފައިވަނީ ގައުމީ ކުޅިވަރު އެސޯސިއޭޝަންތަކަށެވެ. އަދި ސްކޮލާޝިޕް އަށް އެތްލީޓުން ހޮވާފައިވަނީ މޯލްޑިވްސް އޮލިމްޕިކް ކޮމިޓީއިންނެވެ.
