ތިލަދުންމަތީ ދެކުނުބުރީ ހަނިމާދޫ މަގުތައް ޒަމާނީ ފެންވަރަށް ތަރައްޤީކުރުމާއި ބަނދަރުގެ މަޝްރޫޢު އަންނަ މަހު ނިންމާލެވޭނެކަމަށް، އެ މަސައްކަތް ކުރާ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ވިދާޅުވެއްޖެއެވެ.
އާދަމް ޢާޒިމް ހަވާލާދީ ޕީއެސްއެމް ނިއުސްއިން ބުނީ މިހާރު ކުރިއަށްދަނީ ހަނިމާދޫ ބަނދަރުގައި ތަރައްޤީކުރާ ކުޑަ ޖެޓީއާއި އާރްޓީއެލް ފެރީ ގާތްކުރާ ސަރަޙައްދުގައި ޤާއިމުކުރަންޖެހޭ ރޭމްޕްގެ މަސައްކަތްކަމަށެވެ. އަދި މިމަސައްކަތް އަންނަ ފެބްރުއަރީ މަހުގެ ތެރޭގައި އެއްކޮށް ނިމޭނެކަމަށް އާޒިމް ވިދާޅުވިއެވެ.
ހަނިމާދޫ މަގު ހެދުމުގެ އަމަލީ މަސައްކަތް ފަށާފައިވަނީ 15 ޖޫން 2019 ގައެވެ. މި މަޝްރޫއުގެ ދަށުން 46،466 އަކަމީޓަރުގެ ސަރަހައްދެއްގައި ވަނީ ތާރު އަޅާފައެވެ. މި މަޝްރޫއުގެ ދަށުން 16،518 އަކަމީޓަރުގެ ހިނގާ ސަރަހައްދެއް ވެސް ގާއިމުކޮށްފައިވެއެވެ. އަދި 38،916 އަކަމީޓަރުގެ ދުއްވާ ސަރަޙައްދެއް ގާއިމްކޮށްފައިވާ ކަމަށް އެމްޓީސީސީ އިން ވަނީ ބުނެފައެވެ. މީގެ އިތުރުން 19،679.7 އަކަމީޓަރުގެ ސަރަހައްދެއްގައި މަގުމަތީ ނިޝާން ހަރުކުރުމުގެ މަސައްކަތްވެސް މި މަޝްރޫއުގެ ދަށުން ވަނީ ކޮށްފައެވެ.
ހަނިމާދޫ މަގުތަކުގައި ތާރު އެޅުމުގެ މަޝްރޫއަކީ 76.09 މިލިއަން ރުފިޔާގެ މަޝްރޫއުއެކެވެ.
2020 ވަނަ އަހަރު މެއި 5 ގައި މޮބިލައިޒްކުރެވުނު ހަނިމާދޫގެ ބަނދަރު ތަރައްގީ ކުރުމުގެ މަޝްރޫއު މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ އިން އެމްޓީސީސީ އާ ހަވާލުކުރީ 57.1 މިލިއަން ރުފިޔާ އަށެވެ. ނަމަވެސް އެންމެ ފަހުން އެމްޓީސީސީ ބުނީ މި މަޝްރޫޢަކީ 64.6 މިލިއަން ރުފިޔާގެ މަޝްރޫޢެއްކަމަށެވެ.
ހަނިމާދޫ ބަނދަރުގެ މަޝްރޫޢުގެ ދަށުން، 53،522.50 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުމާއި، 31،575.50 ކިއުބިކް މީޓަރުގެ ބަނދަރުގެ ނެރަށް ވަދެވެން އޮންނަ ދިމާ ފުންކުރުމަށް ވަނީ ހަމަޖެހިފައެވެ. އަދި 355 މީޓަރުގެ ސަރަޙައްދެއްގައި ބޭރުތޮށި ލުމާއި، 50 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 270 މީޓަރުގެ ސަަރަޙައްދެއްގައި އެއްގަމުތޮށި ލުމާއި، 2583 އަކަމީޓަރުގެ ސަރަޙައްދެއްގައި ޕޭވްމަންޓް ހެދުމުގެ މަސައްކަތް ހިމެނެއެވެ.
