‘ބިންވެރިޔާ ސްކީމް’ ގެ ދަށުން ދޫކުރުމަށް ހަމަޖެހިފައިވާ ގޯތިތައް ހިމެނޭ ޕްލޮޓްތައް ސާފުކުރުމުގެ މަސައްކަތް ފަށައިފިއެވެ.
އެޗްޑީސީން ބުނީ މާލޭގެ ރައްޔިތުންނަށް ގޯތި ދޫކުރުމަށްޓަކައި ހިންގާ ‘ބިންވެރިޔާ ސްކީމް’ ގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމަށްޓަކައި ކަނޑައެޅިފައިވާ ޕްލޮޓްތައް ކްލިއާކޮށް، ގޯތި ކަނޑައެޅުމަށް ވާންޖެހޭ ތައްޔާރީތައް ވުމަށް ހައުސިން މިނިސްޓްރީ އާއެކު މަސައްކަތް ކުރަން ފަށާފައިވާ ކަމަށެވެ. އެ ގޮތުން އެ މިނިސްޓްރީ އާއެކު، ހުޅުމާލޭގައި ‘ބިންވެރިޔާ ސްކީމް’ ގެ ދަށުން ދޫކުރުމަށް ހަމަޖެހިފައިވާ ގޯތިތައް ހިމެނޭ ސަރަހައްދު ސާފުކުރުމުގެ މަސައްކަތް މިއަދު ކުރިއަށް ގެންދެވިފައިވާ ކަމަށް އެ ކޯޕަރޭޝަނުން ބުނެއެވެ.
އެޗްޑީސީން ބުނި ގޮތުގައި ހައުސިން މިނިސްޓްރީ އާއެކު ކުރެވެމުންދާ މަސައްކަތުގައި ހުޅުމާލޭގެ ދެވަނަ ފިޔަވަހީގެ އެކި ސަރަހައްދުތައް ހިމެނޭހެން ‘ބިންވެރިޔާ ސްކީމް’ ގެ ދަށުން ގޯތި ދިނުމަށް ޕްލޭނުގައި ހިމަނާފައިވާ ކަމުގައެވެ. ސްކީމްގެ ދަށުން ގޯތި ލިބިފައިވާ ފަރާތްތަކުގެ ނަންތައް މި އަންނަ މާޗު މަހު އާންމުކޮށް އިއުލާނުކުރުމަށް ހައުސިން މިނިސްޓްރީން ނިންމާފައިވާކަމަށް ވެސް އެ ކޯޕަރޭޝަނުން ބުނެއެވެ. އެހެންކަމުން މިހާރު ކުރަމުންދަނީ ބިން ސާފުކޮށް، އެއްވަރުކުރުމުގެ މަސައްކަތް ކަން ފާހަގަކޮށް އެޗްޑީސީން ބުނީ ގޯތި ދިނުމަށް ވާން ޖެހޭ އެންމެ ފަހުގެ ތައްޔާރީތައް ވުމަށް އެ ކޯޕަރޭޝަނުން މަސައްކަތްތައް ކުރަމުންދާ ކަމަށެވެ. އެ ގޮތުން އެ ސަރަހައްދުތަކަށް ބޭނުންވާނެ ޔުޓިލިޓީގެ ހިދުމަތްތައް ގާއިމުކުރުމުގެ މަސައްކަތްތައްވެސް ކުރެވެމުންދާ ކަމަށް އެޗްޑީސީން ބުނެއެވެ.
‘ބިންވެރިޔާ ސްކީމް’ އަކީ މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ސަރުކާރުން އެކަށައަޅާފައިވާ ސިޔާސަތެކެވެ. އެ ސިޔާސަތުގެ ދަށުން މާލޭގެ ރަށްވެހިންނަށް 3،000 ގޯތި ދޫކުރުމަށް ސަރުކާރުން ވަނީ ނިންމާފައެވެ. އެއީ ހުޅުމާލެއިން ދޫކުރާ 1،000 ގޯއްޗާއި ގުޅީފަޅު ހިއްކައިގެން އެތަނުން ދޫކުރާ 2،000 ގޯއްޗެވެ.
