ހޮނިހިރު ދުވަހު ބާއްވާ އެމްޑީޕީގެ ޕްރައިމަރީގައި ވާދަކުރައްވާ ރައީސް މުހައްމަދު ނަޝީދުގެ ފަހު ޖަލްސާ ރޭ މާލޭގެ އާޓިފިޝަލް ބީޗުގައި ނިންމާލީ، ގިނަ ވައުދުތަކާއެކު ޕްރައިމަރީ ވެސް، ރިޔާސީ އިންތިހާބު ވެސް ކާމިޔާބު ކުރައްވާނެ ކަމުގެ ޔަގީންކަން ދެއްވުމަށް ފަހުއެވެ.
ކެމްޕޭނު ލަވައާއެކު ވާހަކަތައް ބުރި ކުރައްވައި، ތަކުރާރުކޮށް އަމުނާލެއްވީ ވެރިކަމުގައި ކުރައްވާނެ ކަމުގެ ވައުދު ލިސްޓުގައި ހިމެނެނީ ޓެކްސް ކުޑަކުރުން، ތަކެތީގެ އަގު ކުޑަކުރުން، އާމްދަނީ އިތުރުކޮށްދީ ޖީބަށް ވަންނަ ވަރު އިތުރު ކުރުން، 17 ރުފިޔާއަށް ހުރި މަހުގެ އަގު 25 ރުފިޔާއަށް ބޮޑުކޮށް މަސްވެރި ކިރާމަހަށް ވަގުތުން ލާރި ދިނުން އަދި ޑުރަގުގެ ވަބާއިން ޒުވާނުން މިންޖުކުރުމެވެ.
އަދި ޖަލުސާގައި ނިންމާލަމުން ނަޝީދު ވިދާޅުވީ އަނެއް ދިވެހިރާއްޖޭގެ މަލަމަތި ވަނީ ކުރިމަތީގައި ކަމަށާއި އެ ރާއްޖެއަށް ކުރާ ދަތުރު މި ނޮވެމްބަރު މަހު ފަށާނެ ކަމަށެވެ.
އެގޮތުން ދެން ހޮވޭ އެމަނިކުފާނުގެ ސަރުކާރެއްގައި އެމްޑީޕީގެ ސިޔާސަތުތައް ތަންފީޒުކުރަން ފަށާނެ ކަމަށާއި ދިވެހިރާއްޖެއަކީ ރައްޔިތުންގެ ރާއްޖެއަކަށް އަނެއްކާވެސް ވެގެންދާނެ ކަމަށެވެ.
