ދިވެހި ސިފައިންނާއި، އިނގިރޭސިވިލާތުގެ ރޯޔަލް މިލިޓަރީ ޕޮލިހާއި ގުޅިގެން ރާއްޖޭގައި އަސްކަރީ ތަމްރީންތަކެއް ފަށައިފިއެވެ. މި ތަމްރީންތަކަކީ 9 ދުވަހުގެ މުއްދަތަށް ކުރިއަށްގެންދާ ތަމްރީންއެކެވެ.
އެމްއެންޑީއެފުން ވިދާޅުވީ، މި ތަމްރީންތައް ކުރިއަށްދާނީ މާލެ، ހުޅުމާލޭ ފޭސް 1 އަދި ހުޅުމާލެ ފޭސް 2ގެ އެކި ސަރަޙައްދުތަކުގައެވެ. ތަމްރީން ކުރިއަށްދާ ވަގުތު މާލެއާއި ހުޅުމާލޭގައި އިނގިރޭސިވިލާތުގެ ރޯޔަލް މިލިޓަރީ ޕޮލިހާއި، ދިވެހި ސިފައިން އެކި ސަރަޙައްދުތަކުގައި ހަތިޔާރާއެކު ހަރަކާތްތެރިވާނެކަމަށް އެމްއެންޑީއެފުން މަޢުލޫމާތުދެއްވައެވެ.
މި ތަމްރީނަކީ ދިވެހި ސިފައިންގެ ހުނަރާއި ޤާބިލުކަން އިތުރުކުރުމަށް ކުރިއަށްގެންދާ ތަމްރީން ޕްރޮގްރާމެކެވެ. ތަމްރީން ޕްރޮގްރާމް މިއަދުން ފެށިގެން މިމަހުގެ 9ވަނަ ދުވަހާއި ހަމައަށް ކުރިއަށްގެންދާނެއެވެ.
އެމްއެންޑީއެފުން އަންނަނީ، ބޭރުގެ ޤައުމުތަކުގެ އަސްކަރިއްޔާއާއި ގުޅިގެން މިފަދަ ތަމްރީންތައް ބާއްވަމުންނެވެ. އެގޮތުން މިދިޔަ އަހަރުގެ އޮގަސްޓް މަހުވެސް ވަނީ ދިވެހިރާއްޖެއާއި، އެމެރިކާގެ އަސްކަރިއްޔާ ގުޅިގެން ކައުންޓަރ ޓެރަރިޒަމް ފަރިތަކުރުންތަކެއް، ސެންޓްރަލް އޭރިޔާ އާއި މާލެކައިރި ކަނޑުގެ ސަރަހައްދުގައި ކުރިއަށްގެންގޮސްފައެވެ.
އެ ތަމްރީން ފަރުމާކުރެވިފައިވަނީ ޓެރަރިޒަމްގެ އެކި ހާދިސާތަކަށް އިޖާބަދިނުމުގައި ސަލާމަތީ ބާރުތަކުން ގުޅިގެން މަސައްކަތްކުރުމަށް އެހީތެރިވެވޭނެ ގޮތަށާއި، ކައުންޓަރ ޓެރަރިޒަމްގެ މަސައްކަތްތަކުގައި އެމެރިކާ އަދި ދިވެހިރާއްޖޭގެ ގުޅުން ބަދަހިކުރެވޭނެ ގޮތްތަކާ ގުޅޭގޮތުންނެވެ. މިފަދަ ހަރަކާތްތަކުގެ ސަބަބުން ސަރަހައްދީ ރައްކާތެރިކަމާއި އަމާންކަން ދެމެހެއްޓުމުގެ މަސައްކަތްތައް އިތުރަށް ވަރުގަދަވެގެން ދާނެކަމަށް އެމްއެންޑީއެފުން ވިދާޅުވެއެވެ.
