ވިނަރެސް ފްލެޓްތައް ލިބޭ މީހުންގެ ދާއިމީ ލިސްޓު އާންމުކޮށްފި އެވެ.
ވިނަރެސް ފްލެޓް ލިބޭ މީހުންގެ ދާއިމީ ލިސްޓް އާންމުކުރުމަށްފަހު އެޗްޑީސީން ނެރުނު އިއުލާންގައި ބުނެފައިވަނީ މި ލިސްޓުގައި ގުޅީފަޅުން ކުރިން ދޫކުރި ފްލެޓްތައް ލިބުނު މީހުންނާއި، ސީލައިފް ކުންފުނިން ހަދަން އުޅުނު ފްލެޓަށް ފައިސާ ދެއްކި މީހުންނާއި، ހިޔާ ފްލެޓް ލިބި ދޫކޮށްލި މީހުން ނުހިމެނޭނެ ކަމަށެވެ.
ދާއިމީ ލިސްޓްގައި ހިމެނޭ މީހުންގެ ތެރޭގައި މާލޭގައި ދިރިއުޅޭތާ 15 އަހަރުވެފައިވާ އެކަމަކު މާލޭގައި ރަޖިސްޓްރީވެފައި ނުވާ ކެޓަގަރީ އިން 1094 މީހަކާއި މާލޭގައި ރަޖިސްޓްރީވިތާ 15 އަހަރު ވެފައިވާ މީހުންގެ ކެޓަގަރީގައި ހިމެނޭ 267 މީހަކު ހިމެނެ އެވެ.
އެޗްޑީސީން ބުނީ ލިސްޓްގައި ނަން އޮތް ނަމަވެސް މައި-އެޕްލިކަންޓް އަދި ކޯ-އެޕްލިކަންޓްގެ ގޮތުގައި ފޯމު ހުށަހަޅާފައިވާ ފަރާތްތަކުގެ ތެރެއިން ފްލެޓެއް ގަތުމުގެ ފުރުސަތު ލިބޭނީ އެތަނުން ކޮންމެވެސް އެކަކަށް ކަމަށެވެ.
އެޗްޑީސީން ބުނީ ދާއިމީ ލިސްޓްގައި ހިމެނޭ މީހުންގެ މާލީ ގާބިލްކަން ބެލުމަށްފަހު ފްލެޓަށް ބުކިން ފީ ނެގުމާއި ބޭނުންވާ ފްލެޓް އިހްތިޔާރު ކުރުމަށް ފުރުސަތު ދޭނެ ކަމަށެވެ. ފްލެޓް ގަންނަން އެއް ފަހަރާ ފައިސާ ދައްކަން ހުށަހެޅި ނަމަވެސް އަދި ލޯނު މެދުވެރިކޮށް ފައިސާ ދައްކަން ހުށަހެޅި ނަމަވެސް މާލީ ގާބިލްކަން ބަލާނެ ކަމުގައިވެސް އެޗްޑީސީން ބުނެފައިވެ އެވެ.
ލިސްޓްގައި ހިމެނޭ ފަރާތްތަކަށް ހަމައެކަނި މުއާމަލާތު ކުރާނީ އެޗްޑީސީގެ ނަމްބަރު 3353535 މެދުވެރިކޮށް ފޯނުގެ ޒަރީއާ އިންނެވެ. އިތުރު އެހެން ނަންބަރަކުން ނުގުޅާނެ ކަމަށާއި އެސްއެމްއެސް އަދި ލިންކެއް ވެސް ނުފޮނުވާނެކަން ފާހަގަކޮށް އެޗްޑީސީއިން ވަނީ ސަމާލުވުމަށް ބުނެފައެވެ.
