ބޮޑުފޮޅުދޫ ކައުންސިލުން “ލޯކަލް ކައުންސިލްސް ޕާފޯމަންސް އިންޑެކްސް” ގެ އެއްވަނަ ދެވަނަ ފަހަރަށް ހޯދައިފިއެވެ.
ރޭ ލޯކަލް ގަވަރމަންޓް އޮތޯރިޓީ (އެލްޖީއޭ) އިން އާންމުކުރި “ލޯކަލް ކައުންސިލްސް ޕާފޯމަންސް އިންޑެކްސް ނަތީޖާ 2021” ނަތީޖާއަށް ބަލާއިރު ބޮޑުފޮޅުދޫ ވަނީ މުޅި ރާއްޖެއިން އެއްވަނަ ރަށު ކައުންސިލަށް ހޮވިފައެވެ. މީގެ އިތުރުން ޕާރޓިސިޕޭޝަން އިންޑެކްސްއިން އެއްވަނަ ހޯދާފައިވެއެވެ.
މިކަމާއި ގުޅިގެ ފޭސްބުކުގައި އާއްމުކުރި ޕޯސްޓެއްގައި ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް ވިދާޅުވީ ކައުންސިލް މެމްބަރުންނާއި ސްޓާފުންނާއި އ.ތ.މ ކޮމިޓީ އާއި މުޅި ރައްޔިތުން ހިމެނޭހެން ކުރެވޭ މަސައްކަތްތަކުގެ ނަތީޖާ ވަރަށް ވެސް ފޮނި ކަމަށާއި މިއީ ރައްޔިތުންގެ ކާމިޔާބީއެއް ކަމަށެވެ. އަދި ރަށުގެ އެންމެހާ ފަރާތްތަކަށް މަރުހަބާ ކިޔާ ކަމަށެވެ.
ރޭ ހޮވި ވަނަތަކަށް ނަޒަރެއް
ގަދަހަމާންތި ދަރަޖަ ލިބުނު ކައުންސިލްތައް:
- މިލަނދުންމަޑުލު އުތުރުބުރީ އަތޮޅު ކައުންސިލް
- ނިލަންދެއަތޮޅު އުތުރުބުރީ އަތޮޅު ކައުންސިލް
- ހައްދުންމަތީ އަތޮޅު ކައުންސިލް
ރަނާހަމާންތި ދަރަޖަ ލިބުނު ކައުންސިލްތައް:
- އއ. ބޮޑުފޮޅުދޫ ކައުންސިލް
- ބ. ފެހެންދޫ ކައުންސިލް
- ހއ. ތުރާކުނު ކައުންސިލް
ރޭ ހަފްލާގައި އެކި ދާއިރާތަކުން މާރާދަ ހަނދާނީ ފިލާ ލިބޭ ކައުންސިލްތައްވެސް އެލްޖީއޭއިން ވަނީ އިއުލާންކޮށްފައެވެ. އެގޮތުން، ދިވެހިރާއްޖޭގެ އިދާރީ ދާއިރާތައް ލާމަރުކަޒީ ގާނޫނަށް އަމަލުކުރުމާ ގުޅޭ އުސޫލުން، ހިންގުމުގެ މިންވަރު ދައްކުވައިދޭ ސަބްއިންޑެކްސްއިން ހަނދާނީ ފިލާ ތިލަދުންމަތީ އުތުރުބުރީ އަތޮޅު ކައުންސިލާއި ޅ. ކުރެންދޫއިން ވަނީ ހާސިލްކޮށްފައެވެ.
މީގެ އިތުރުން އިފެކްޓިވް އިންޑެކްސް ބައިން، މިލަދުންމަޑުލު އުތުރުބުރީ އަތޮޅު ކައުންސިލާއި ބ. ފެހެންދޫ ކައުންސިލުން ހަނދާނީ ފިލާ ހާސިލް ކޮށްފައިވާއިރު، ޕާރޓިސިޕޭޝަން އިންޑެކްސްއިން ނިލަންދެއަތޮޅު އުތުރުބުރީ އަތޮޅު ކައުންސިލާއި އއ. ބޮޑުފޮޅުދޫ ކައުންސިލް ވަނީ ހަދަނީ ފިލާ ހާސިލް ކޮށްފައެވެ.
އެކައުންޓެބިލިޓީ އިންޑެކްސްއިން މިލަދުންމަޑުލު އުތުރުބުރީ އަތޮޅު ކައުންސިލާއި ތ. ބުރުނީ ކައުންސިލް ހަދަނީ ފިލާހޯދިއިރު، ސެކިއުރިޓީ އިންޑެކްސްއިން މިލަދުންމަޑުލު ދެކުނުބުރީ އަތޮޅު ކައުންސިލާއި ރ. ހުޅުދުއްފާރު ކައުންސިލް ވަނީ ހަނދާނީ ފިލާ ހާސިލްކޮށްފައެވެ.
އެލްޖީއޭއިން ބުނިގޮތުގައި 2020 ވަނަ އަހަރާއި އަޅައިބަލާއިރު ޕަރފޯމަންސް އިންޑެކްސްގައި އެންމެ ބޮޑު ކުރިއެރުމެއް ހޯދައިގެން ކާންނާ ހަނދާނީ ފިލާ 2021 ވަނަ އަހަރު ހާސިލްކުރީ މިލަދުންމަޑުލު އުތުރުބުރީ އަތޮޅު ކައުންސިލުންނާއި ބ. ކަމަދޫ ކައުންސިލުންނެވެ.
ލޯކަލް ކައުންސިލްގެ ޕަރފޯމަންސް އިންޑެކްސްއަކީ ކައުންސިލްތަކުން ކުރާ މަސައްކަތްތަކުގެ ފެންވަރު ވަޒަންކޮށް، ކައުންސިލްތަކުގެ ރޭންކިންގ ކަނޑައެޅުމަށް ލޯކަލް ގަވަރމެންޓް އޮތޯރިޓީ (އެލްޖީއޭ)އިން ތައާރަފުކުރި އިންޑެކްސްއެކެވެ. މި އިންޑެކްސް އެންމެ ފުރަތަމަ ތައާރަފުކުރީ 2015 ވަނަ އަހަރުއެވެ.
