އެމްޓީސީސީން އަމީނީ މަގުގައި ތާރު އަޅަން ފަށައިފި އެވެ.
އެމްޓީސީސީން އަމީނީ މަގުގައި ތާރު އެޅުމުގެ މަސައްކަތް މިރޭ ފަށާފައިވާއިރު، އަމީނީމަގުގެ އިރުން ފެށިގެން ސްޓެލްކޯ އާ ހަމައަށް މިރޭ ތާރު އަޅައި ނިންމާލެވޭނެ ކަމަށް އެކުންފުނިން ވަނީ ބުނެފައެވެ.
ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އާ ހަވާލުކޮށްގެން ޒަމާނީ ފެންވަރަށް ތަރައްޤީ ކުރަމުން އަންނަ އަމީނީ މަގުގެ ބައެއްގައި ތާރު އެޅުމަށް ސަބްކޮންޓްރެކްޓް އުސޫލުން އެމްޓީސީސީއާ ހަވާލުކޮށްފައިވަނީ މިދިޔަ ހުކުރު ދުވަހު އެވެ.
އަމީނީމަގު ޒަމާނީ ފެންވަރަށް ތަރައްޤީކުރުމުގެ މުޅި މި މަޝްރޫޢުގައި 1.79 ކިލޯމީޓަރުގެ މަގު ހިމެނޭއިރު، މި މަސައްކަތް އެކުންފުނިން ކުރަމުންދަނީ ޖުމްލަ 13 ސެގްމަންޓަކަށް ބަހާލައިގެންނެވެ. އެގޮތުން މިހާރު ކުރިއަށްދަނީ ސެގްމެންޓް 4 ގައި ފެނާ ނަރުދަމާ އެޅުމުގެ މަސައްކަތްތައް ކަމަށް ރޯޑް ޑިވެލޮޕްމަންޓް ކޯޕަރޭޝަނުންވަނީ ބުނެފައެވެ.
މާލެ ސްޓްރީޓް ސްކޭޕިންގް ޕްރޮޖެކްޓުގެ ދަށުން އަމީނީ މަގުގައި ތާރުއަޅާ ޒަމާނީ ފެންވަރަށް ތަރައްޤީކުރުމުގެ މަޝްރޫޢު ޕްލޭނިންގ މިނިސްޓްރީން ރޯޑް ޑިވަލޮޕްމަންޓް ކޯޕަރޭޝަން، އާރު.ޑީ.ސީއާ ޙަވާލުކޮށްފައިވަނީ 3 ޖުލައި 2022 ގައެވެ. މަގު ހެދުމުގެ އަމަލީ މަސައްކަތް އާރްޑީސީން ފެށީ 12 ސެޕްޓެމްބަރު 2022ގައެވެ.
މި މަޝްރޫޢު އާރްޑީސީއާ ހަވާލުކުރީ 84.4 މިލިއަން ރުފިޔާއަށެވެ.
