ވެރިކަންކުރާ އެމްޑީޕީގެ ރިޔާސީ ޓިކެޓު އެ ޕާޓީގެ ޕްރައިމަރީ ކާމިޔާބުކުރެއްވި ކެނޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް އެރުވުމަށް މިރޭ ކާނިވާ ސަރަހައްދުގައި އޮތް ރަސްމިއްޔާތުގައި އެ ޕާޓީގެ ރައީސް، ރައީސް މުޙައްމަދު ނަޝީދު ބޮއިކޮޓްކޮށްފިއެވެ.
ރައީސް އިބްރާހީމަށް ރިޔާސީ ޓިކެޓު އެރުވުމަށް ކާނިވަލުގައި މިރޭ ބޭއްވި ރަސްމިއްޔާތުގައި ރައީސް ނަޝީދާއި އެމަނިކުފާނަށް ތާއީދުކުރައްވާ މަޖިލިސް މެންބަރުން ބައިވެރިވެވަޑައިގެންފައިނުވެއެވެ.
ޕްރައިމަރީން ބަލިވި ނަޝީދު ރައީސް ސޯލިހަށް ތާއީދު ކުރައްވަން ނިންމަވައިފައެއް ނުވެ އެވެ. އޭގެ ބަދަލުގައި އެމަނިކުފާނު ގެންދަވަނީ “ފިކުރެއްގެ ދިރުން” ނަމުގައި ޕާޓީގެ އެތެރޭގައި ގޮފިތަކެއް އުފައްދައި، އެ ގޮފިތަކަށް 50،000 މެންބަރުން ހަމަކުރުމަށް މަސައްކަތް ކުރައްވަމުންނެވެ.
އެމްޑީޕީގެ ރިޔާސީ ޕްރައިމަރީގައި ރައީސް ސޯލިހަށް 24،572 ވޯޓު ލިބިވަޑައިގެންނެވި އެވެ. ރައީސް މުހައްމަދު ނަޝީދަށް ލިބިވަޑައިގަތީ 15،631 ވޯޓެވެ.
