ކައުންސިލްތަކުގެ ސިވިލް ސާވިސް މުވައްޒަފުންނާއި އެހެން އިދާރާތަކުގައި މަސައްކަތްކުރާ ސިވިލް ސާވިސްގެ މުވައްޒަފުންގެ މެދުގައި ގެންގުޅޭ މުސާރައިގެ ފަރަގު ނައްތާލާ އެ މުވައްޒަފުންގެ މުސާރަ ބޮޑުކުރުމަށް ގޮވާލާ ހދ.ހަނިމާދޫ ކައުންސިލުން ގަރާރެއް ނެރެފިއެވެ.
އެ ގަރާރުގައި ބުނެފައިވަނީ ރައްޔިތުންނަށް ދޭން ޖެހޭ އެންމެހާ ހިދުމަތްތަކާއި ރަށުގެ ތަރައްގީއަށް ކުރަން ޖެހޭ އެންމެހާ މަސައްކަތްތަކާއި އަދި ދައުލަތުގެ މެންޑޭޓްތަކާއި އެ އިދާރާތަކުގައި ދޭ ބައެއް ހިދުމަތްތައް މެދުނުކެނޑި ރަށުގައި ދިނުމުގެ މަސައްކަތްތައް ކުރުމާއި ގައުމީ އިދާރާތަކުން އެދޭ އެންމެހައި ކަންކަމުގައި އެހީ ފޯރުކޮށްދެނީ ކައުންސިލްތަކުގެ އިދާރީ މުވައްޒަފުން ކަމަށެވެ.
މީގެ އިތުރުން ލާމަރުކަޒީ ގާނޫނުން މަތިކޮށްފައިވާ ކަންތައްތައް ކުރުމުގައި ކައުންސިލްތަކުގައި ތިބޭ މަދު މުވައްޒަފުން، އެ ހިދުމަތްތައް މެދުނުކެނޑި ރައްޔިތުންނަށް ފޯރުކޮށްދިނުމަށް ގިނަ ވަގުތުތަކެއް ހޭދަކުރަން ޖެހޭކަން ފާހަގަކޮށްފައިވެއެވެ.
އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ 13 ވަނަ އަހަރު ގުނަމުންދާއިރު ލާމަރުކަޒީ އުސޫލުން ހިންގުމަށް ހަވާލުކޮށްފައިވާ ކައުންސިލްތަކުގެ މުވައްޒަފުންގެ މުސާރައަށް އެދެވޭ ބަދަލުތަކެއް އައިސްފައިނުވާ ކަމަށާއި ރަށެއްގައި ދައުލަތުގެ އެތައް އިދާރާތަކެއް ގާއިމުވެފައިވާއިރު، ލާމަރުކަޒީ ގާނޫނުގެ އެންމެހައި ޒިންމާތަކެއް މަތިކުރެވިފައިވާ ކައުންސިލްތަކުގެ މުވައްޒަފުންގެ މުސާރަ އާއި އެލަވެންސްތައް، ރަށުގައި ގާއިމުވެފައިވާ އެހެނިހެން ހުރިހާ އިދާރާތަކުގެ މުވައްޒަފުންގެ މުސާރައަށްވުރެ ކުޑަވެފަ، ފަރަގު ބޮޑުވުމަކީ އެ ހަނިމާދޫ ކައުންސިލްގެ ނުހަނު ބޮޑު ކަންބޮޑުވުމެއްކަމަށެވެ. އަދި މިކަމުގެ ސަބަބުން ކިޔަވައިގެން ތިބި ތަޖުރިބާ ހުރި ރަނގަޅު މުވައްޒަފުން ކައުންސިލްތަކުގެ ވަޒީފާތަކުން ވަކިވުމާއި ކިޔަވައިގެން ތިބި ރަނގަލު މުވައްޒަފުން ކައުންސިލްތަކަށް ހޯދުމުގައި އިންތިހާއަށް ދަތިތަކާ ކުރިމަތިވެފައިވާކަމަށެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުން ހަރުދަނާކުރުމަށް ކައުންސިލްތަކަށް ހައިބްރިޑް ސިސްޓަމް ތައާރަފުކޮށް ކައުންސިލްގެ މުވައްޒަފުންނަށް ވަކި އިދާރީ އޮނިގަނޑެއް ހެދިފައިވާއިރު މިހާތަނަށް ހެދިފައިވާ އެންމެހާ އިދާރީ އޮނިގަނޑުގެ ތެރެއިން އެންމެ މުސާރަ ކުޑަ އޮނިގަނޑަކީ ކައުންސިލްތަކުގެ މުވައްޒަފުންގެ އިދާރީ އޮނިގަނޑުކަމަށާއި ދައުލަތުގެ ޕޭ ޕްރޭމްވަރކްގެ މިންގަނޑުތައް ބަޔާންކޮށް 1 މެއި 2022 ގައި ގެޒެޓްކުރެވިފައިވާ އުސޫލުގައި މުއައްސަސާތައް ހަތަރު ގިންތިއަށް ގިންތިކުރެވިފައިވާއިރު ގިންތީގެ އެންމެ ތިރިން ގިންތިކުރެވިފާ އިދާރާތަކަކީ ކައުންސިލްތައް ކަމަށް އެ ގަރާރުގައި ވެއެވެ.
އަދި ދައުލަތުގެ ގިނަ އިދާރާތަކުގައި މަސައްކަތްކުރާ ސިވިސްސާވިސް މުވައްޒަފުންނަށް އެކި ނަންނަމުގައި މުސާރައިގެ 35 އިންސަތައިގެ އެލަވެންސް، ކައުންސިލުގެ އިދާރީ ކޮންމެ މުވައްޒަފުންނަށް ދިނުމަށްވެސް ހަނިމާދޫ ކައުންސިލްގެ ގަރާރުގައި ގޮވާލާފައިވެއެވެ.
ހަނިމާދޫ ކައުންސިލްގެ އިތުރުން ހދ އަތޮޅު ކައުންސިލް، ފިނޭ ކައުންސިލާއި ކުރިނބީ ކައުންސިލުން ވަނީ މިފަދަ ގަރާރެއް ނެރެފައެވެ.
