ރިޝްވަތު ނަގައި ބިމެއް ވިއްކާލަން އުޅުނު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މުވައްޒަފަކު މަގާމުން ވަކިކޮށްފިއެވެ.
އެޗްޑީސީން މިއަދު ބުނީ ކޯޕަރޭޝަންގެ މުވައްޒަފަކު ހެދިފައިވާ އުސޫލުތަކާ ހިލާފަށް އޮޅުވާލައިގެން އަމިއްލަ ފަރާތަކަށް ބިމެއް ދޭނެ ކަމަށް ބުނެ މަންފާއެއް ހޯދުމަށް މަސައްކަތް ކުރާ ކަން ފާހަގަ ކުރެވުނު ހިސާބުން އެ މައްސަލަ ބަލަން ފެށި ކަމަށެވެ. އަދި އިއްޔެ އެ މުވައްޒަފު މަގާމުން ވަކިކޮށްފައިވާ ކަމަށެވެ.
ކަސްޓަމަރަށް އޮޅުވާލައިގެން ފައިސާގެ މުއާމަލާތެއްކޮށް އެ މުވައްޒަފުގެ އަމިއްލަ ބޭންކް އެކައުންޓަށް ފައިސާ ޖަމާކޮށްފައިވާކަން އެ މައްސަލައިގެ ތަހުގީގުގައި ފާހަގަކުރެވުނު ކަމަށް އެޗްޑީސީން ކުރިން ބުނެފައި ވެއެވެ.
އެޗްޑީސީން ބުނީ އެ ކޯޕަރޭޝަންގެ ފަރާތުން ފައިސާގެ އެއްވެސް މުއާމަލާތެއް އަމިއްލަ މުވައްޒަފެއްގެ ބޭންކް އެކައުންޓް މެދުވެރިކޮށް ނުކުރާނެ ކަމަށާއި މިކަމުގައި އާންމު ރައްޔިތުން ސަމާލުވުމަށް އެދޭ ކަމަށެވެ.
ދާދި ފަހުން އެޗްޑީސީން ވައްކަންކުރި މައްސަލައެއްގައި ވެސް އެ ކުންފުނީގެ މުވައްޒަފަކު ވަނީ ވަޒީފާއިން ވަކިކޮށްފަ އެވެ. އެކަމަކު އެ ވައްކަމާ ބެހޭ އެއްވެސް ތަފްސީލެއް އެ ކުންފުނިން މިހާތަނަށް ހާމައެއް ނުކުރެ އެވެ.
