ޖުމްހޫރީ ޕާޓީ، ރިޔާސީ ޓިކެޓް އެ ޕާޓީގެ ލީޑަރު ގާސިމް އިބްރާހީމަށް ދިނުމަށް ޕާޓީގެ ކައުންސިލުން ފާސްކޮށްފިއެވެ.
ޖޭޕީ ރިޔާސީ ޓިކެޓް ދިނުމާމެދު ގޮތެއް ނިންމުމަށް މިއަދު ބޭއްވި ޕާޓީގެ ކައުންސިލް ބައްދަލުވުމުގެ އިއްތިފާގުން ވަނީ ޖޭޕީގެ ރިޔާސީ ކެންޑިޑޭޓެއްގެ ކިބައިގައި ހުންނަންޖެހޭ ޝަރުތުތައް ހަމާވާތީ، ގާސިމަށް ރިޔާސީ ޓިކެޓް ދިނުމަށެވެ.
ގާސިމް އިބްރާހިމް ވަނީ 2008 އަދި 2013 ވަނަ އަހަރުގެ ރިޔާސީ އިންތިހާބުގައިވެސް ވާދަކުރައްވާފައެވެ. އެ ދެ އިންތިޚާބުގައިވެސް ދެވަނަ ބުރަކަށް ދާން ބޭނުންވާ ވަރަށް ގާސިމަށް ވޯޓު ލިބިފައެއްނުވެއެވެ.
ކުރިއަށް އޮތް ރިޔާސީ އިންތިހާބުގައި ވާދަކުރަން މިހާތަނަށް ނިންމާފައިވަނީ ގާސިމްގެ އިތުރުން އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި ޕީޕީއެމްގެ ރިޔާސީ ކެނޑިޑޭޓް ރައީސް އަބްދުﷲ ޔާމީންއެވެ. ނަމަވެސް ރައީސް ޔާމީންގެ މައްޗަށް މަނީ ލޯންޑަރިންގއާއި ރިޝްވަތު ހިފުމުގެ ކުށް ސާބިތުވެ، ޖަލު ހުކުމެއް އިއްވާފައިވާތީ އެމަނިކުފާނަށް އިންތިހާބުގައި ވާދަކުރުމުގެ ފުރުސަތު ވަނީ ހަނިވެފައެވެ.
މި 3 ކެނޑިޑޭޓުންގެ އިތުރުން، އެހެން ބައެއް ކުދި ޕާޓީތަކާއި ޕާޓީއަކަށް ނިސްބަތްނުވާ ބައެއް އާއްމު ފަރާތްތަކުންވެސް ވަނީ ކުރިއަށް އޮތް ރިޔާސީ އިންތިހާބުގައި ވާދަކުރާނެކަން އިއުލާންކޮށްފައެވެ.
