ދިވެހިންގެ އެހީއާއެކު ގާޒާގައި އަޅާ މިސްކިތް އިފްތިތާހު ކޮށްފިއެވެ.
އިންޓަނޭޝަނަލް އެއިޑް ކެމްޕެއިން (އައިއޭސީ)އިން ކުރި ޓްވީޓެއްގައި ބުނެފައިވަނީ މިސްކިތް އެޅުމުގެ މަސައްކަތް މިއަދު އިފްތިތާހު ކޮށްފައިވާ ކަމަށެވެ.
އެ ރަސްމިއްޔާތުގައި ގާޒާގެ އިސް ވެރިންނާއި އެ ސަރަހައްދުގައި ދިރިއުޅޭ ރައްޔިތުން ބައިވެރިވެފައިވާ ކަމަށް ވެސް އެ ޓްވީޓުގައި ބުނެފައިވެެއެވެ.
ދިވެހިންގެ އެހީއާއެކު ގާޒާގައި އަޅާ ފުރަތަމަ މިސްކިތަށް ނަން ދީފައިވަނީ ” މަސްޖިދުލް ޤުދުސް” މިފަދައިންނެވެ.
3 ބުރިއަށް އިމާރަތް ކުރާ މި މިސްކިތަކީ 1100 މީހުންގެ ޖާގައިގެ މިސްކިތެކެވެ. މި މިސްކިތުގައި 3 ފާހަނާ އެކުލެވޭއިރު ފުރަތަމަ ފުލޯ ޚާއްސަ ކުރެވޭނީ އަންހެނުންނަށެވެ. މިތަނުގައި 390 މީހުންގެ ޖާގަ ވެއެވެ.
މި މިސްކިތް އަޅާނީ ގާޒާގެ ކޮންޓްރެކްޓަރަކާ ހަވާލުކޮށްގެން ކަމަށާއި ގާޒާގައި މަސައްކަތަށް ގޮންޖެހުންތަކެއް ކުރިމަތިވި ނަމަވެސް މި އަހަރުގެ ތެރޭގައި މި މަސައްކަތް ނިންމައިލެވޭނެކަމަށް އުންމީދު ކުރާކަމަށް އައިއޭސީން ބުންޏެވެ.
މި އިންޓަނޭޝަނަލް އެއިޑް ކެމްޕެއިން (އައިއޭސީ)ގެ ޞަދަޤާތް ޖާރިޔާ ޕްރޮޖެކްޓްތަކަށް ހާއްސަކޮށްގެން ހުޅުވާލައިގެން ކުރިއަށް ގެންދާ “ތަޖްރީ” ގެ ތެރެއިން ގާއިމުކުރާ މިސްކިތެކެވެ.
“ތަޖްރީ”ގެ ދަށުން ޖުމްލަ ހަތަރު މިސްކިތެއް އެޅުމަށް ވަނީ ހަމަޖެހިފަ އެވެ. “ތަޖްރީ” އަކީ ކޮންމެ ވަގުތަކުވެސް ކޮންމެ އަދަދެއްވެސް ދެއްވޭނެ ދެމިގެންދަނިވި ޞަދަޤާތުގެ ފަންޑެކެވެ.
” ތަޖްރީ ” އަށް އެހީދޭން ބޭނުންވާ ފަރާތްތަކުން ފައިސާ ޖަމާ ކުރާނީ 7770000062742 އެކައުންޓް ނަމްބަރަށެވެ.
