2015 ވަނަ އަހަރުން ފެށިގެން ހަނިމާދޫގައި ހަރަކާތްތެރި ވަމުންދާ ކެތިއަރާ ޖަމިއްޔާއިން ބާއްވަމުންދާ “ކެތިއްރާ މަސްރޭސް” ފީ މާފުކުރަން ނިންމައިފިއެވެ.
އެޖަމިއްޔާއިން މައުލޫމާތު ދޭގޮތުން މި އަހަރު ބައިވެރިވި ޓީމުތަކަށް 2024 ވަނަ އަހަރު މަސްރޭހުގައި ބައިވެރިވުމަށް އެއްވެސް ފީއެއް ނުނަގާނެއެވެ. އަދި އެޓީމުތައް ރަޖިސްޓުރީވާން މިހާރު ވަނީ ފުރުސަތު ހުޅުވާލާފައެވެ. ނަމަވެސް އަލަށް ބައިވެރިވާ ޓީމުތަކުން ބައިވެރި ވުމުގެ ފީއެއް ނަގާނެއެވެ. އަދި މިހާރު ރަޖިސްޓަރީ ވެފައިވާ ޓީމް ނޫން އެހެން ޓީމަކަށް ބަދަލުވާނަމަ އެ ބަދަލުވުމަށް ކުޑަ ފީއެއް ދައްކަން ޖެހޭނެއެވެ.
މިކަން ހާމަކުރީ އިއްޔެ ކުރިއަށްދިޔަ އެޖަމިއްޔާގެ 8 ވަނަ ފިރިހެނުންގެ މަސްރޭ ނިންމުމުގެ ރަސްމިއްޔާތުގައެވެ. މި ފަހަރުގެ ފިރިހެން މަސްރޭހުގައި 15 ޓީމަކުން ވާދަ ކުރިއެވެ.
މުބާރާތުގައި ބައިވެރިވެފައިވާ ޓީމްތަކަކީ ޓީމް ރަނޑުލަކި، ޓީމް ރިހަފޮޅި، މާކުން، ޓީމް ހިބަރު، ޓީމް ގިނި 1، ޓީމް ގިނި 2، ދިރުން ފިޝިންޓީމް، ކަނޑުރޯދި، ޓީމް ފާގަތި، ލަގޮނޑި، ސިލްވާޓިޕް، ފެތުރިސް، ޓީމް ކަރީ، ހުނި ގޮނޑި، އަދި ޓީމް ކުޗްކުޗް ހޯތާހޭ އެވެ.
ފިރިހެން ބައިން ޗެމްޕިއަންކަން ހޯދާފައިވާ ރަނޑުލަކިއެވެ. އެޓީމުން ވަނީ 118.4 ކިލޯ މަސް ބާނާފައެވެ. 93.5 ކިލޯ މަސް ބައިގެން 2 ވަނަ ހޯދީ ސިލްވާރ ޓިޕް އެވެ. 83.9 ކިލޯ މަސް ބައިގެން 3 ވަނަ ހޯދީ މާކުންއެވެ.
މުބާރާތުގެ އެންމެ ގިނަ މަސް ބޭނި ޓީމަށް ހޮވިފައި ވަނީ ދިރުން ފިޝިންގ ޓީމެވެ. އެ ޓީމުން ވަނީ 137 މަސް ބާނާފައެވެ. އެންމެ ބަރު މަސް ބާނައިގެން ފިރިހެން މާ ކެޔޮޅަށް ހޮވިފައި ވަނީ މުހައްމަދު ހުސެން އެވެ. އޭނާ ބާނާފައިވާ މަހުގެ ބަރުދަނަކީ 5.9 ކިލޯއެވެ.
