މަންޓާއިން އިތުރު ސީ ޕްލޭނެއް ގެނެސްފިއެވެ.
މަންޓާގެ އާ ސީ ޕްލޭނަކީ މިދިޔަ އާދިއްތަ ދުވަހު އެމެރިކާއިން ފުރައިގެން ރާއްޖެ އައި ބޯޓެކެވެ. އެ ބޯޓު ރާއްޖެ އައިސްފައިވަނީ އިއްޔެ ހަވީރު 5:37 އެހާކަންހާއިރުއެވެ. މި ސީޕްލޭނާއެކު މަންޓާ އެއަރގެ ސީޕްލޭން ފްލީޓްގެ އަދަދު ވަނީ 19 އަށް އިތުރުވެފައެވެ.
މަންޓާއިން ވަނީ މިދިޔަ އަހަރުގެ ޑިސެމްބަރުމަހުގެ 13 ވަނަ ދުވަހު 12 ބޯޓެއް ހޯދަން އިއުލާންކޮށްފައެވެ. މަންޓާއިން ބުނެފައިވަނީ އެ ކުންފުނިން ބޭނުންވަނީ ޑީއެޗްސީ ޓުވިން އޮޓޯ މަރުކާގެ 12 ބޯޓު ކަމަށެވެ.
މަންޓާއިން ދަނީ ރާއްޖޭގެ ގިނަ ރިސޯޓްތަކަކަށް ސީޕްލޭންގެ ޚިދުމަތް ދެމުންނެވެ. އެތެރޭގެ އުދުހުންތަކަށް ބަލާއިރު ރާއްޖޭގެ 3 އެއަރޕޯޓަކަށް މަންޓާއިން ދަނީ ދަތުރުކުރަމުންނެވެ. އެއީ ހޯރަފުށި، ދަރަވަންދޫ އަދި ކުޑަހުވަދޫ އެއަރޕޯޓެވެ.
ޑޮމެސްޓިކް ދަތުރުތަކުގައި މަންޓާއިން މިހާރު 4 ބޯޓެއް ދަނީ ބޭނުންކުރަމުންނެވެ. އެއީ އޭޓީއާރުގެ 3 ބޯޓާއި، ބީޗް ކްރާފްޓްގެ 1 ބޯޓެވެ.
މަންޓާ އެއަރ އިން އެކުންފުނީގެ ފުރަތަމަ ސީޕްލޭން ގެނައީ އޮކްޓޯބަރު 2019ގައެވެ. އެކުންފުނިން ރަސްމީކޮށް އެތެރޭގެ އުދުހުންތައް ފެށީ ފެބުރުއަރީ 2019ގައެވެ.
