ރަސްމީ ދަތުރުފުޅެއްގައި ރާއްޖެ ވަޑައިގެން އުޅުއްވާ އިންޑިއާގެ ދިފާޢީ ވަޒީރު ރާޖްނާތު ސިންގ 3 ނޮވެންބަރުގެ ހަނދާނީ ބިނާއަށް ޒިޔާރަތް ކުރައްވައި، އިޙްތިރާމް އަދާކުރައްވައިފިއެވެ.
މިއަދު މެންދުރުފަހު ނޮވެމްބަރު 3ގެ ހަނދާނީ ބިނާ ސަރަހައްދަށް އިންޑިއާގެ ދިފާޢީ ވަޒީރު ވަޑައިގެންނެވުމުން އެމަނިކުފާނަށް މަރުޙަބާ ދެންނެވީ، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއެވެ. އަދި އެމަނިކުފާނުގެ ޝަރަފުގައި ވަނީ އޮނަރ ގާޑެއްވެސް އަރުވާފައެވެ.
މި ޒިޔާރަތުގެ ތެރެއިން ބޭއްވި ރަސްމިއްޔާތުގައި ޝަހީދުންގެ ބިނާގައި ދިދަވެރިން ވަނީ ދިދަ މައުންޓްކޮށް، ޝަހީދުންގެ ހަނދާނުގައި ހަމަ ހިމޭންކަމުގެ ސުކޫތެއް ވަނީ ގެނެސްފައެވެ.
މި ޒިޔާރަތުގައި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަތީފްގެ އިތުރުން ސިފައިންގެ ސީނިއަރ އޮފިސަރުން ބައިވެރިވެލެއްވިއެވެ.
