ހދ.ހަނިމާދޫ ބަނދަރު ސަރަޙައްދުގައި ހުރި ވިޔަފާރި ކުރުމަށް ޙާއްސަ ކުރެވިފައިވާ ބިންތައް ކުއްޔަށް ދޫކުރަން ދެވަނަ ފަހަރަށް ހަނިމާދޫ ކައުންސިލުން އިއުލާން ކޮށްފިއެވެ.
މިފަހަރު އިއުލާން ކުރީ 5 ބިމެވެ. މީގެ ކުރިން މި އަހަރު މާރިޗު 29 ވަނަ ދުވަހު ވަނީ 8 ބިމެއް ކުއްޔަށް ދޫކުރަން އިއުލާން ކޮށްފައެވެ. ނަމަވެސް އެފަހަރު ކުރި އިއުލާން ވަނީ 12 އޭޕްރީލް 2023 ވަނަ ދުވަހު ބާތިލް ކޮށްފައެވެ.
އިއްޔެ ހަނިމާދޫ ކައުންސިލުން ކުރި އިއުލާނެއްގައި ބުނީ ހަނިމާދޫ ބަނދަރު ސަރަހައްދުން ވިޔަފާރިއަށް ހާއްސަ ކޮށްގެން 5 ބިމެއް 25 އަހަރަށް ދޫކުރަން ނިންމާފައިވާކަމަށެވެ.
އެގޮތުން ބިން ހޯދަން ޝައުގުވެރިވާ ފަރާތްތަކުން 14 މެއި 2023 ވަނަ ދުވަހު 10:30 ގައި ހަނިމާދޫ ކައުންސިލުގެ ޖަލްސާކުރާ މާލަމުގައި އޮންނަ މަޢުލޫމާތު ދިނުމުގެ ސެޝަންގައި ބައިވެރިވެ، 23 މެއި 2023 ވަނަ ދުވަހު 10:30 އަން އަންދާސީ ހިސާބު ހުށައެޅުމަށް ވަނީ އެދިފައެވެ.
ހަނިމާދޫ ކައުންސިލުން ބުނީ އަންދާސީ ހިސާބު ހުށަހެޅުމުގެ ފުރުޞަތު ދިނުމަށް ހަމަޖެހިފައި ވަނީ މިނިސްޓްރީ އޮފް އިކޮނޮމިކް ޑިވެލޮޕްމެންޓްގައި، ވިޔަފާރި ރަޖިސްޓްރީ ކޮށްފައިވާ ފަރާތްތަކަށް އެކަނި ކަމަށެވެ.
އަދި މަޢުލޫމާތު ދިނުމުގެ ސެޝަންއަށް ވަޑައިނުގަންނަވާ ފަރާތްތަކަށް އަންދާސީ ހިސާބު ހުށަހެޅުމުގެ ފުރުޞަތު ނުދޭނެ ކަމަށް އެ ކައުންސިލުން ބުނެފައިވެއެވެ.
