ހދ. ހަނިމާދޫ ފުޓްބޯޅަ ދަނޑުގެ ލައިޓިން ސިސްޓަމް ޤާއިމުކުރުމުގެ މަސައްކަތް ބަޔަކާ ހަވާލުކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ ކުޅިވަރާ ބެހޭ ވުޒާރާގައި ކުރިއަށްގެންދިޔަ ރަސްމިއްޔާތެއްގައެވެ. ހަނިމާދޫ ފުޓްބޯޅަ ދަނޑުގެ ލައިޓިން ސިސްޓަމް ޤާއިމުކުރުމުގެ މަސައްކަތް ކުރުމަށް ހަވާލުކޮށްފައިވަނީ ތިޙްނާން އިންވެސްޓްމެންޓާއެވެ.
މި އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އަޙުމަދު މުޙައްމަދެވެ. އަދި ތިޙްނާން އިންވެސްޓްމެންޓުގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޕްރޮޖެކްޓް މެނޭޖަރ މުޙައްމަދު ލަތީފެވެ.
މި މަސައްކަތް އެ ކުންފުންޏާ ހަވާލުކުރީ މަސައްކަތް ފަށާތާ، 44 ދުވަހުގެ ތެރޭގައި ދަނޑުގައި ލައިޓް ހަރުކޮށް ނިންމަން ޖެހޭ ގޮތަށެވެ. މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން ދެ މިލިޔަން ފަސްލައްކަ ހަތްދިހަ ތިންހާސް އަށްސަތޭކަ ސާޅީސް ނުވަ ރުފިޔާ އަށްޑިހަ ތިން ލާރި ޚަރަދުކޮށްގެން ކުރިިއަށްގެންދަން ނިންމާފައިވާ މަޝްރޫއެކެވެ.
