ކުޅުދުއްފުށީ ސިޓީ ކައުންސިލުން އިންތިޒާމުކޮށްގެން ބާއްވާ ކުޅުދުއްފުށި ޗެމްޕިއަންޝިޕް 2023 ގެ ފުރަތަމަ މެޗުން ހަނިމާދޫ ޒުވާނުންގެ ޖަމިއްޔާ ޓީމް ބަލިވެއްޖެއެވެ.
މިއަދު ހަވީރު ކުޅުދުއްފުށީ ޒޯން ސްޓޭޑިއަމްގައި ކުޅެވުނު ފޯރިގަދަ މެޗުގައި ޓީމް ޒިގްޒެގު އަތުން ހަނިމާދޫ ޒުވާނުންގެ ޖަމިއްޔާ ޓީމް ބަލިވީ 2 ލަނޑު 0 ލަނޑުންނެވެ.
މެޗުގެ ފުރަތަމަ ހާފު ދެޓީމަށް ވެސް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭނުން ނުހިފިފައެވެ. ފުރަތަމަ ހާފު ނިމުނީ ދެޓީމުންކުރެ އެއްވެސް ޓީމަކަށް ލަނޑެއް ނުޖެހިއެވެ.
ނަމަވެސް ދެވަނަ ހާފު ދެޓީމުން ވެސް އިތުރަށް ކުޅުން ވަރުގަދަކޮށް ލަނޑެއް ޖެހުމަށް މަސައްކަތްކުރިއެވެ. އެގޮތުން މެޗުގެ 63 ވަނަ މިނެޓުގައި ޒިގްޒެގުން ވަނީ އަވަސް ކައުންޓާ އެޓޭކެއްގައި ލީޑު ނަގާފައެވެ. މިލަނޑަކީ ޒިގްޒެގުގެ ޖޯޒީ ނަމްބަރު 29 ޕްރިންސް ލާބީ އޭރިއާ ތެރެއަށް ވަދެ ފޮނުވާލި ހަމަލާ ގޯލު ދަނޑީގައި ޖެހިފައި ނުކުތް ވަގުތު ޒިގްޒެގްގެ އަބޫބަކުރު އާދަމް ކާމިޔާބުކުރި ލަނޑެކެވެ.
މެޗުގައި ޒިގްޒެގުގެ ދެވަނަ ލަނޑު 81 ވަނަ މިނެޓުގައި އެޓީމަށް ޖަހައިދިނީ ޕްރިންސް ލާބީއެވެ. މެޗުގެ މޮޅު ކުޅުންތެރިޔަކަށް ވެސް ހޮވިފައިވަނީ ޕްރިންސް ލާބީއެވެ.
މި މުބާރާތުގެ ދެވަނަ މެޗުގައި މާދަމާ ހަވީރު 4 ޖަހާއިރު މާއްޓޭ ސްޕޯޓްސްއިން ނުކުންނާނީ ނޮޅިވަރަންފަރު ސްޕޯޓްސް ކުލަބާ ދެކޮޅަށެވެ.
ފޮޓޯ:ކުޅުދުއްފުށީ ސިޓީ ކައުންސިލް
