ސްކައުޓް އެސޯސިއޭޝަނުން ކުރިއަށްގެންދާ ބޭސިކް ޔުނިޓް ލީޑަރސް ޓްރެއިނިންގ ކޯހުގެ “ރެސިޑެންޝަން ކޭމްޕް” ރާއްޖޭގެ ދެ ސަރަހައްދެއްގައި ފެށިގެން ކުރިއަށް އެބަދެއެވެ.
މި ކޭމްޕް ކުރިޔަށްދަނީ ނ. ކެނދިކުޅުދޫގައާއި މާލެ ސަރަހައްދުން ފަރުކޮޅުފުށީގައެވެ.
ކެނދިކުޅުދޫގައި ކުރިއަށްދާ ރެސިޑެންޝަން ކޭމްޕަކީ، ސްކައުޓް ލީޑަރުން ތަމްރީނުކުރުމުގެ ބޭސިކް ކޯހުގައި ނޫނު އަތޮޅު ހިމެނޭ ސަރަހައްދުން ބައިވެރިވި ބައިވެރިންނަށް އަމާޒުކޮށްގެން ބާއްވާ ކޭމްޕެވެ.
ފަރުކޮޅުފުށީގައި ކުރިއަށްދާ ކޭމްޕަކީ މާލެ ސަރަހައްދުން ކޯހުގައި ބައިވެރިވި ބައިވެރިންނަށް އަމާޒުކޮށްގެން ކުރިއަށްގެންދާ ދެވަނަ ކޭމްޕެވެ.
430 އަށްވުރެ ގިނަ ބައިވެރިންނާއެކު ސްކައުޓް ލީޑަރުން ތަމްރީނު ކުރުމުގެ އަސާސީ ކޯސް، ސްކައުޓް އެސޯސިއޭޝަނުން ފަށާފައިވަނީ މިއަހަރުގެ މެއިމަހުގެ ތެރޭގައެވެ.
މި ކޯހުގެ ރެސިޑެންޝަން ކޭމްޕަކީ، ކޯހުގައި ހިމެނޭ އީ-ލާރނިންގ މޮޑިއުލްއާއި، އެސައިންމަޓް މޮޑިއުލް އަދި ޑިސްކަޝަން މޮޑިއުލް ފުރިހަމަ ކުރުމަށްފަހު، ކޯހުގެ ބައިވެރިން އަމަލީގޮތުން ކަންކަން ދަސްކުރުމުގެ މައްޗަށް ބާއްވާ ކޭމްޕެވެ.
މި ކޯހުގެ ފުރަތަމަ ރެސިޑެންޝަން ކޭމްޕް، މާލެ ސަރަހައްދުން ފަރުކޮޅުފުށީގައި މިމަހު 1 ވަނަ ދުވަހުން ފެށިގެން 3 ދުވަހުގެ ނިޔަލަށް ކުރިޔަށް ގެންގޮސްފައި ވާއިރު، މިމަހުގެ 8 ވަނަ ދުވަހުން ފެށިގެން 10 ވަނަ ދުވަހުގެ ނިޔަލަށް ހދ. ހަނިމާދޫގައިވެސް ވަނީ ރެސިޑެންޝަލް ކޭމްޕް ކުރިޔަށް ގެންގޮސްފައެވެ.
