“އިމުގަ” ޕޯޓަލް މެދުވެރިކޮށް ޕާސްޕޯޓް ހެއްދުމަށް އެދި ހުށަހެޅޭނެކަމަށް އިމިގްރޭޝަނުން ބުނެފިއެވެ.
މީގެކުރިން ޕާސްޕޯޓް ހައްދަންޖެހެނީ އިމިގްރޭޝަން އޮފީހަށް ގޮސް ފޯމު ފުރައި ސްކޭންކޮށްގެންނެވެ. އިމިގްރޭޝަނުން ބުނީ މިއީ ކަރުދާސް ބޭނުންކުރާ މިންވަރު މަދުކުރުމުގެ ގޮތުން ގެނައި ބަދަލެއްކަމަށެވެ.
އަލަށް ގެނެވުނު ބަދަލާއެކު ޕާސްޕޯޓަށް އެދި ހުށަހެޅުމުގެ ފުރުސަތު އިތުރަށް ފަސޭހަވާނެކަމަށް އިމިގްރޭޝަނުން ބުނެއެވެ.
މި ހިދުމަތް ވަގުތީ ގޮތުން މިދިޔަ އަހަރުވެސް އިމިގްރޭޝަނުން ދިނެވެ. އެގޮތުން މިދިޔަ އަހަރުގެ ރޯދަ މަހު އުމުރާއަށް ދިޔަ މީހުންނަށް، ރޯދަ މަސް ނިމެންދެން ޕޯޓަލް މެދުވެރިކޮށް ޕާސްޕޯޓަށް އެދުމުގެ ފުރުސަތު ދިނެވެ.
