ވެރިކަމުގައި ތިބެ މުޒާހަރާކުރަން ނިކުންނަ ހިސާބަށް ކަންކަން ދާ ނަމަ ރައްޔިތުން އެކަމާ ވިސްނަން ޖެހޭ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކ އަތޮޅުގެ ގުޅިއަށް ކުރެއްވި ކެމްޕެއިން ދަތުރުފުޅުގައި ރައީސް އިބްރާހިމް މުހައްމަދު ސޯލިހު ވިދާޅުވީ، ސަރުކާރުން އެންމެ ބޮޑު އިސްކަމެއް ދެނީ، ރައްޔިތުންނަށް އަމާން ރާއްޖެއެއް ގެނެސްދިއުމަށް ކަމަށެވެ. އެމަނިކުފާނު ވިދާޅުވީ، ރައްޔިތުންނަށް ހަލަބޮލިކަން ގެނައުމަކީ އެމްޑީޕީގެ ސިޔާސަތެއް ނޫން ކަމަށެވެ.
ރައީސް ވިދާޅުވީ، ގައުމުގެ އަމާންކަން ބަލަހައްޓަން ފުލުހުންނާއި ސިފައިން އެބަ ތިބި ކަމަށެވެ.
މިގޮތަށް މުޒާހަރާ ކުރަން ނުކުތީ ކޮން ބައެއް ކަމެއް ރައީސް ވިދާޅުނުވި ނަމަވެސް، އެމްޑީޕީން މިހާރު ވަކިވެވަޑައިގެންފައިވާ ކުރީގެ ރައީސް މުހައްމަދު ނަޝީދުގެ ވެރިކަމުގައި އޭރު ސަރުކާރު ހިންގި މައި ޕާޓީ އެމްޑީޕީން ވަނީ ސަރުކާރާ ދެކޮޅަށް މުޒާހަރާކޮށްފަ އެވެ.
