ށ. ކޮމަންޑޫއަށް ތެޔޮ އަންލޯޑުކުރަމުން ދަނިކޮށް އެފްއެސްއެމްގެ ތެޔޮ ބޯޓެއް ފަޅައިގެން ގޮސްފިއެވެ.
މިކަމުގެ ތަފްސީލް ހިއްސާކުރަމުން، އެމްއެންޑީއެފުން ބުނީ، އެ ތެޔޮބޯޓު ފަޅައިގެންދިޔައީ، ށ. ކޮމަންޑޫއަށް ތެޔޮ އަންލޯޑުކުރަމުން ދަނިކޮށް، އެ ރަށު ޖެޓީގެ ޝީޓް ޕައިލްއެއްގައި ޖެހިގެން ކަމަށާއި، އެ ބޯޓު ފަޅައިގެން ގޮސް ދިޔަވާން ފެށުމުން އެމްއެންޑީއެފް ނޮދަން އޭރިއާ ކޯސްޓްގާޑް ފަސްޓް ސްކޮޑްރަންއިން އެ ބޯޓަށް އެހީތެރިކަން ފޯރުކޮށްދޭން ފެށިކަމަށެވެ.
މި ހާދިސާގެ މަޢުލޫމާތު އެމްއެންޑީއެފް ނޮދަން އޭރިއާ ކޯސްޓްގާޑް ފަސްޓް ސްކޮޑްރަންއަށް ލިބުމާއެކު، އެ ސަރަހައްދަށް ގޮސް އެހީތެރިކަން ފޯރުކޮށްދީފައިވާކަމަށް އެމްއެންޑީއެފްއިން ބުނެއެވެ. އެއީ މިއަދު ހެނދުނު 10:00 ޖަހާކަށްހާއިރެވެ.
އެމްއެންޑީއެފްއިން ބުނީ މި ހާދިސާގައި ނޮދަން އޭރިއާ ކޯސްޓްގާޑް ފަސްޓް ސްކޮޑްރަންގެ ޑައިވަރުންގެ ޓީމެއް އެ ސަރަހައްދަށްގޮސް ހަރަކާތްތެރިވެފައިވާކަމަށެވެ.
ޝީޓް ޕައިލްގައި ޖެހި އެފްއެސްއެމްގެ ތެޔޮ ބޯޓުން 8 އިންޗި ވަރުގެ ތަނެއް ފަޅައިގެން ގޮސްފައިވާއިރު، ބޯޓު މިހާރު އޮތީ ށ.މަތިކޮމަންޑޫއަށް ބީއްސާލާފައެވެ. އަދި، ފަޅައިގެން ގޮސްފައިވާ ތަނަށް އުނގުރިއެއް ޖަހައި ދިޔަވުން މިހާރު ކޮންމެވެސް ވަރަކަށް ކޮންޓްރޯލް ކުރެވިފައިވާ ކަމަށްވެއެވެ.
ބޯޓު ދިޔަވުން މިހާރު ކޮންޓްރޯލް ކުރެވިފައިވާއިރު، ބައެއް ނޫސްތަކުގައި ބޯޓު އަޑިއަށްދާކަމަށް ރިޕޯޓްކޮށްފައިވީނަމަވެސް އެއީ ދޮގު މަޢުލޫމާތެއްކަމަށް އެމްއެންޑީއެފުން ބުނެއެވެ.
