ހަނިމާދޫ ޑަބްލިއު،ޑީ،ސީ އާއި ދާރުލް ޤުރުއާން ވަަސުންނާ ގުޅިގެން ހިންގި ޖަނާޒާ ކޯސް ކާމިޔާބުކަމާއެކު ނިންމައިލައިފިއެވެ. މިއީ ދާރުލް ޤުރުއާން ވަަސުންނާ ޖަނާޒާ ލެވަލް 1 ގެ 49 ވަނަ ބެޗެވެ.
މިކޯސް ކުރިއަށް ގެންދިޔައީ ޖުލައި 6 ވަނަ ދުވަހުން ފެށިގެން 14 ވަނަ ދުވަހުގެ ނިޔަަލަށް ހަނިމާދޫ އިޖްތިމާއީ މަރުކަޒުގައެވެ. މި ކޯހުގައި 8 ފިރިހެނުން އަދި 22 ކަނބަލުން ވަނީ ތައުލީމް ހާސިލްކޮށްފައެވެ.
މިކޯހުގެ އެންމެހައި ހަރަދުތައް ބަލަހައްޓައިފައިވަނީ ހަނިމާދޫ ޑަބްލިއު،ޑީ،ސީގެ ބަޖެޓުންނެވެ. މިކަމަށް 60،000 ރުފިޔާ ހޭދަކުރަން އެ ކޮމެޓީންވަނީ ފާސްކޮށްފައެވެ.
މިކޯހުގައި ކުރިއަށް ގެންދެވުނު ބައިތަކުގެ ތެރޭގައި ޖަނާޒާ އަމަލީ އަދި ތިއަރީގެ އިތުރުން ފިގުހުގެ ބައި ހިމެނެއެވެ.
މި ކޯހުގައި ކިޔަވައިދެއްވީ ރާއްޖޭގެ އެކި ކަންކޮޅުތަކުގައި ކާމިޔާބު ކަމާއެކު މިފަދަ ކޯސް ކުރިއަށް ގެންގޮސްފައިވާ ޢަބްދުއް ލަތީފް އަހްމަދާއި ޢަބްދު ﷲ ނަސީރު އަދި އައިމިނަތު ޢަބްދުލް ހަކީމެވެ.
މިއީ އެމްކިއުއޭ ލެވަލް 1 ގެ ސެޓްފިކެޓް ފެންވަރުގެ ކޯހެކެވެ.
