ރިޔާސީ އިންތިހާބުގެ ކެމްޕޭނަށް އެމްޑީޕީގެ ކެނޑިޑޭޓް، ރައީސް އިބްރާހިމް މުހައްމަދު ސޯލިހް މިއަދު ހއ. އަތޮޅަށް ފުރާވަޑައިގެންފިއެވެ.
ރައީސްގެ މި ދަތުރުފުޅުގައި ރިޔާސީ އިންތިހާބުގައި އެމްޑީޕީއާއެކު ކޯލިޝަން ހަދާފައިވާ އެމްޑީއޭގެ އިސްވެރިންނާއި އަދާލަތު ޕާޓީގެ އިސްވެރިން ވެސް ބައިވެރިވެވަޑައިގަންނަވައެވެ.
ރައީސްގެ މި ދަތުރުޅުގައި ހއ ގައި މީހުން ދިރިއުޅޭ 14 ރަށުގެ ތެރެއިން 10 ރަށަކަށް ވަޑައިގަންނަވާނެކަމުގައި ރައީސް ސޯލިހްގެ ކެމްޕޭނު ޓީމުން މައުލޫމާތުދެއެވެ.
އެގޮތުން މިއަދު ހޯރަފުށި، ތުރާކުނު، އުލިގަމު، މޮޅަދޫ އަދި އިހަވަންދުއަށް ވަޑައިގަންނަވާނެއެވެ. އަދި މާދަމާ މާރަންދޫ، ތަކަންދޫ، ކެލާ، ވަށަފަރު އަދި ދިއްދުއަށް ވަޑައިގަންނަވާނެއެވެ.
ރައީސްގެ މި ދަތުރުފުޅުގައި ސަރުކާރުން ހއ. އަތޮޅުގައި ކުރަމުން އަންނަ ތަރައްގީގެ މަޝްރޫއުތަކުގެ ތެރެއިން ނިމިފައިވާ މަޝްރޫއުތައް އިފްތިތާހް ކޮށްދެއްވުން އޮންނާނެއެވެ. އަދި ކެމްޕެއިން ބައްދަލުވުންތައް ބޭއްވުމަށް ވެސް ވަނީ ހަމަޖެހިފައެވެ. އަދި ކެމްޕެއިން ޖަލްސާތައް ވެސް މި ދަތުރުފުޅުގައި ބޭއްވުމަށް ވަނީ ހަމަޖެހިފައެވެ.
