ދެކުނު ކޮރެއާގައި ބާއްވާ 25 ވަނަ ވޯލްޑް ސްކައުޓް ޖަމްބޮރީގައި ބައިވެރިވާ އަރަބިއްޔާގެ ސްކައުޓުންނާ ގްރޫޕް ސްކައުޓް ލީޑަރ އުސްތާޛާ ޢާއިޝަތު ޢަޒްމާ ބައްދަލު ކުރައްވައިފިއެވެ.
މި ބައްދަލު ކުރެވުމުގައި ގްރޫޕް ސްކައުޓް ލީޑަރ އުސްތާޛާ ޢާއިޝަތު ޢަޒްމާ ސްކައުޓުނާ މުހާތަބު ކުރަވަމުން ވިދާޅުވީ ކޮންމެ ތަނެންގައި ވީ ނަމަވެސް އަޅުގަނޑުމެންނީ މުސްލިމުން ކަމުގައި ހަނދާން ބެހެއްޓުމާއެކު ފަރުޟު ފަސް ނަމާދަށް ރައްކާތެރިވުން ވަރަށް މުހިންމު ކަމަށެވެ. އަދި ދިވެހިންނަކީ އަހުލާގު ރަނގަޅު ޚުލްގު ހެޔޮބައެއްކަމަށާ އަރަބިއްޔާގެ ދަރިވަރުން މިކަންކަމުގައި ނަމޫނާ ދެއްކުން ވަރަށް މުހިއްމު ކަމަށެވެ.
އިތުރަށް ވާހަކަ ކުރިއަށް ގެންދަމުން އޭނާ ވިދާޅުވީ މި ފަދަ ޖަމްބޮރީތަކުން ލިބޭ ހުނަރާއި މައުލޫމަތު ރަނގަޅަށް ދަސްކޮށް ޖަންބަރީގެ ފަހުން އެހެން ދަރިވަރުންނާ ހިއްސާކުރުން އެއީ މުހިންމު ކަމެއް ކަމަށެވެ.
ދުނިޔޭގެ 25 ވަނަ ސްކައުޓް ޖަމްބޮރީގައި ދިވެހިރާއްޖެ ތަމްސީލުކުރާ 425 ކޮންޓިންޖެންޓުން ބައިވެރިވާއިރު އަރަބިއްޔާ ސްކައުޓް ގްރޫޕަށް ނިސްބަތްވާ 18 ފަރާތަކުން ބައިވެރިވެއެވެ. އެއީ 8 ސްކައުޓުންނާއި، އިންޓަރނޭޝަނަލް ސަރވިސް ޓީމުގައި ހިމެނޭ 5 ސްކައުޓުންނާއި، ދިވެހި ކޮންޓިންޖެންޓް ސްޓާފުންގެ ގޮތުގައި ބައިވެރިވާ 3 މެމްބަރުންނާއި، އޭއެސްޖީއަށް ނިސްބަތްވާ އިތުރު 2 މެމްބަރުންނެވެ.
ދުނިޔޭގެ 25 ވަނަ ސްކައުޓް ޖަމްބޮރީ ކުރިއަށްދާނީ އޮނގަސްޓް 1 ން 12 އަށް ދެކުނު ކޮރެއާގެ ސޭމެންޖިއަމްގައެވެ.
