ދެކުނު ކޮރެއާގައި މިހާރު ކުރިއަށްދާ 25 ވަނަ ވޯރލްޑް ސްކައުޓް ޖަމްބޮރީގައި ބައިވެރިވާ ދިވެހި ސްކައުޓު ދަރިވަރުންގެ ބެލެނިވެރިން ކަންބޮޑުނުވުމަށް ދަ ސްކައުޓް އެސޯސިއޭޝަން އޮފް މޯލްޑިވްސް އިން އެދިއްޖެއެވެ.
ދިވެހި ސްކައުޓް އެސޯސިއޭޝަނުން މިކަމަށް މިއެދުނީ، ޖަމްބޮރީ ބާއްވާ ސަރަހައްދަށް ތޫފާނެއް އަރާނެކަމަށް ކޮރެއާ މީޓިއޮރޮލޮޖިކަލް އެޑްމިނިސްޓްރޭޝަނުން ދިން އިންޒާރާއެކު، ޖަމްބޮރީ މެދުކަނޑާލުމަށްފަހު ޖަމްބޮރީގެ ހުރިހާ ބައިވެރިން ރައްކާތެރި ހިސާބުތަކަށް ބަދަލުކުރުމަށް ނިންމުމާ ގުޅިގެންނެވެ.
ދިވެހި ސްކައުޓް އެސޯސިއޭޝަނުން މިއަދު އާންމުކުރި މެސެޖެއްގައި ބުނެފައިވަނީ، ޖަމްބޮރީގައި ބައިވެރިވާ ދިވެހި ދަރިވަރުންގެ ސަލާމަތާއި ރައްކާތެރިކަމަށް އަޅަންޖެހޭ ހުރިހާ ފިޔަވަޅުތަކެއް، ކަމާބެހޭ ފަރާތްތަކާ ގުޅިގެން އަޅަމުންގެންދާ ކަމަށެވެ.
މިކަމާ ގުޅޭގޮތުން ކޮރެއާއަށް ދިވެހި ސަރުކާރުން ކަނޑައަޅާފައި ހުންނަވާ ނޮން-ރެސިޑެންޓް އެމްބަސެޑަރ ހަސަން ސާބިރުގެ އިތުރުން، ކޮރެއާގައި ހުންނަ ދިވެހި ސަރުކާރުގެ ކޮންސިއުލޭޓާވެސް ބަރާބަރަށް ގުޅަމުންދާ ކަމަށް ސްކައުޓް އެސޯސިއޭޝަނުން ބުނެއެވެ.
25 ވަނަ ވޯރލްޑް ސްކައުޓް ޖަމްބޮރީގައި ދިވެހިރާއްޖެ ހިމެނޭގޮތުން 155 ގައުމުން 43،000 އާއި ގާތްކުރާ އަދަދެއްގެ ބައިވެރިން ބައިވެރިވެއެވެ.
މި ހުރިހާ ބައިވެރިންގެ ސަލާމަތާއި ރައްކާތެރިކަމަށް ދެކުނު ކޮރެއާ ސަރުކާރާއި، ޖަމްބޮރީ އިންތިޒާމުކުރާ ކޮމިޓީ ގުޅިގެން މިހާރުވަނީ ޚާއްސަ މަސައްކަތްތަކެއް ފަށާފައެވެ.
އެގޮތުން، ޖަމްބޮރީގެ ހުރިހާ ބައިވެރިން، ތޫފާނުގެ އަސަރު ނުކުރާ އެހެން ހިސާބުތަކަށް ބަދަލުކުރަން ވަނީ ނިންމާފައެވެ. އަދި ޖަމްބޮރީގެ ކަންކަން ބަލަހައްޓަވާ ދެކުނު ކޮރެއާ ސަރުކާރުގެ މިނިސްޓަރާއި، ސަރުކާރުގެ އިސް ވަފުދެއްވަނީ، ބޭރު ގައުމުތަކުގެ ސްކައުޓް ވަފުދުތަކާ ބައްދަލުކޮށް މައުލޫމާތު ހިއްސާކޮށްފައި ވެއެވެ.
ޖަމްބޮރީގެ ބައިވެރިން ރައްކާތެރި ސަރަހައްދުތަކަށް ބަދަލުކުރާނީ މާދަމާ ކަމަށް ސްކައުޓް އެސޯސިއޭޝަނުން ބުނެއެވެ.
ޖަމްބޮރީ ބާއްވާ ސަރަހައްދު ދޫކޮށް ދާންޖެހުނަސް ޖަމްބޮރީ ނިންމާލީ ނޫން ކަމަށާއި، ރައްކާތެރި ސަރަހައްދުތަކުގައި އުޅޭއިރު ޖަމްބޮރީގެ ބައިވެރިންނަށް ތަފާތު ހަރަކާތްތައް ހިންގުމަށް ރޭވިފައިވާ ކަމަށް ސްކައުޓް އެސޯއޭޝަނުން މައުލޫމާޔު ދެއެވެ.
ޖަމްބޮރީ ރަސްމީގޮތުން ނިންމުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އޮގަސްޓް 11 ވަނަ ދުވަހު ވެރިރަށް ސޯލްގައެވެ. އެއަށްފަހު ފުރުމާ ހަމައަށް ހުރިހާ ބައިވެރިންވެސް ތިބޭނީ ވެރިރަށުގައެވެ.
މިވަގުތު ދެކުނު ކޮރެއާގައި ދިވެހި ދިވެހި ސްކައުޓް އަދި ގާރލްގައިޑް ހުރިހާ ކުދިންގެ ހާލުވެސް ރަނގަޅު ކަމަށް މައުލޫމާތު ލިބިފައި ވެއެވެ.
ޖަޕާނަށް މިހާރު އަރާފައިވާ “ހެނަން” ތޫފާން ކުއްލިއަކަށް މިސްރާބު ބަދަލުވެ މި ހަފްތާގެ މެދުތެރޭގައި ކޮރެއާ ޕެނިންސޫލާއަށް އަރާނެ ކަމަށާއި، އަދި ވޯރލްޑް ޖަމްބޮރީ ކުރިއަށްދާ ސަރަހައްދަށް ތޫފާނުގެ ސީދާ އަސަރު ކުރާނެ ކަމަށް ކޮރެއާ މީޓިއޮރޮލޮޖިކަލް އެޑްމިނިސްޓްރޭޝަނުން ލަފާކޮށްފައި ވެއެވެ.
ޖަމްބޮރީ ކުރިއަށްދާ ސަރަހައްދަށް ތޫފާން އަރާނެކަމަށް ލަފާކޮށްފައިވަނީ މިމަހުގެ 9 ވަނަ ދުވަހުގެ ރޭގެ ވަގުތެއްގައެވެ. ތޫފާނުގައި ގަދަފަދަ ވަޔާއެކު ބޯކޮށް ވާރޭ ވެހޭނެކަމަށްވެސް ލަފާކޮށްފައި ވެއެވެ.
