އެމްޑީޕީން މިއަހަރުގެ ރިޔާސީ އިންތިޚާބަށް ތައްޔާރުކުރި މެނިފެސްޓޯގެ ފުރަތަމަ ސިޔާސަތު ރޭ އިފްތިތާހުކޮށްފިއެވެ. މިމެނިފެސްޓޯ އިފްތިތާހްކޮށްދެއްވީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓް އިބްރާހިމް މުހައްމަދު ޞާލިހް ދ. އަތޮޅަށް ކުރައްވަމުން ގެންދަވާ ދަތުރުފުޅުގައި ދ.ކުޑަހުވަދޫގައި ބޭއްވި ޖަލްސާގައެވެ.
އެމްޑީޕީގެ މެނިފެސްޓޯ ބަހާފައިވަނީ 5 ސިޔާސަތެއްގެ މައްޗަށެވެ. އޭގެ ތެރެއިން ރޭ އިފްތިތާހުކުރެއްވީ “އުފާވެރި ދިރިއުޅުން” މި ސިޔާސަތެވެ. އެ ސިޔާސަތު ބިނާކޮށްފައިވަނީ ދުޅަހެޔޮ، އުފެއްދުންތެރި އަދި ފުދުންތެރި މުޖުމަޢެއް ބިނާކުރުމުގެ ބޭނުމުގައެވެ.
މި ސިޔާސަތު ވަނީ 3 ބަޔަކަށް ބަހާލާފައެވެ. އެއީ ދުޅަހެޔޮ ބަދަހި މުޖުތަމައު، އުފެއްދުންތެރި ފުދުންތެރި ޖީލެއް، އަދި ޝާމިލު، އޯގާތެރި ރައްޔިތުންގެ ބައެވެ.
