އަހަރެން މަސައްކަތުގެ ވަރުބަލިކަމާއި ހާސްކަން ފިލުވާލުމަށް އަބަދުވެސް އެންމެ ގިނައިންކުރާ ކަމަކީ ހަބަރު ކިޔުމެވެ. ނޫސް ކިޔުމެވެ. އަހަރެން ދަންނަ މަދު ބަޔަކަށް މިކަން އެނގޭނެއެވެ. ދުވަސް ފުރިހަމަވާނީ މިކަން ކުރެވިގެންނެވެ. ނަމަވެސް މިއަދު، ނޫސް ކިޔައިގެން ހާސްކަން ފިލާނޭ ގޮތެއް ނުވިއެވެ. މާޔޫސްކަންވީ އިތުރެވެ. އަލާކެނޑޭނޭ ގޮތެއް ހަމަ ހިލާ ނުވިއެވެ. ނޫސްތަކުގައިވާ ހަބަރެއް ފެނި އުދާސްތައް އިތުރުވީއެވެ. ހިތައް އަރާފޭބި އިހުސާސްތައް އޮބިއަޅާގެންވެސް މައިތިރިއެއް ނުވިއެވެ.
“ދިވެހިން މަރާފަ ވިޔަސް އިންޑިޔާ މީހުން ބޭނުމިއްޔާ ރާއްޖެ ހިފިދާނެ”
މިކިޔަނީ އަޅެ ކީކޭތޯ؟ މިކުރަނީ އަޅެ ކޮން ކަމެއްތޯ؟ މިވާހަކައެއްގެ މަގުޞަދަކީ ކޮބައިތޯ؟ މި ފަހި ކޮށް އަމާންކަމާއި އެކު ކޮށާ މިދެނީ ކޮން މަގެއްތޯ؟ މިމަލާމާތާއި ފުރައްސާރަ ކުރެވެނީ ކޮން ބަޔަކަށްތޯ؟ މިވާހަކައެއް މިދައްކަނީ އަޅެ ފަހެ ކާކުތޯ؟ ހުސް ސުވާލު! އެހެން ނޫންތޯ؟
ރަނގަޅު ވާހަކައެކެވެ. ދިވެހިން މަރާފަ ވިޔަސް އިންޑިޔާ މީހުން ބޭނުމިއްޔާ ރާއްޖެ ހިފިދާނެއެވެ. އެކަމަކު ބުނަން ހެއްޔެވެ. ދިވެހިންގެ ފުރާނަ ނެތް ހަށިތައްމަތީ ހިނގާފައެވެ. ރާއްޖެ ހިފަނީ މިވާހަކައެއް ދެއްކި ބޭފުޅާއާއި އެބޭފުޅާގެ އާއިލާ ނުހިމަނާ ހެއްޔެވެ؟. ވަކި ކުލައެއްގެ މީހުން އެއްފަރާތް ކޮއްފަ ހެއްޔެވެ؟ ކުލައަކަށް ނިސްބަތް ނުވާ މީހުންނަށް ހަދާނީ ކިހިނެއް ހެއްޔެވެ؟ އެއީ ކީއްވެ ހެއްޔެވެ؟ އެބޭފުޅާއާއި އެބޭފުޅާގެ އާއިލާ މީހުންނަކީ “މަށް ދިވެހީންނަށް” ނުވަނީތޯއެވެ؟ އެބޭފުޅާއާއި އާއިލާއަކީ އެކިޔާ ހިންދު ކަރާގެ ބަޔަކީތޯއެވެ.؟ ހަމަ ގައިމުވެސް މި ޤައުމުގެ ވަޒީރުންގެ މަޖިލީހުގައި ތިބުން ލާޒިމީ “މަށް ދިވެހީންނެވެ”.
އަދަބުވެރިކަމާއި އެކު ދަންނަވަމެވެ. ތި ބަސްމަގުގެ މިސްރާބު ގެއްލުމުގެ ކުރިން ހަފޮޅުން އެތެރެވާން އެބަ ޖެހެއެވެ. ވެފައި ތިހުރި “ބުރޯ” ކަމަކުން ހަމަބިމަށް ފައިބަން އެބަޖެހެ އެވެ. މި ޤައުމުގެ މިނިވަންކަމާއި އިސްތިގުލާލަށް ހިތުގައި ތިއޮންނަނީ ހިމާރު ކުލުނުތާ އެވެ. ޤައުމުގެ މާލިއްޔަތުގެ “ބޮޑު ތިޖޫރީގެ ފޫ” ހިންދު ކަރައަށް ދޫކޮއްލި ގޮތަށް މިނިވަންކަމާއި އިސްތިގުލާލަށް އެހެން ނުހައްދަވާށެވެ. އާރާއި ބާރު ދެއްވަނީ މާތް ﷲ އެވެ. މިއަދު، މާދަމާއަށް ވާހެން ،މާދަމާ މިއަދަށް ވެދާނެ އެވެ. ތިބޭފުޅުން ކަހަލަގެ ސިޔާސީ ބޭފުޅުންނަށް، މި ޤައުމުގެ މިނިވަންކަން ބޭނުން ނެތަސް އަޅުގަނޑުމެން ބޭނުމެވެ. އަޅުގަނޑުމެންގެ ދަރިންނާއި ދަރިންގެ ދަރިންނަށް މިނިވަންކަންމަތީ ހިނިތުންވާން މި ޤައުމު ބޭނުމެވެ. ޤައުމުގެ މަސްއޫލުވެރިން މި ދަރަޖައަށް ވެއްޓި ފިތި ބާރުވުމަކީ ވަރަށް ދެރަވަރުގެ ކަންކަމެވެ.
ވަޒީރުއެވެ. ހީވާގޮތުން ތާރީހު ކިޔާ އުޅެމުނޫންތޯއެވެ؟. އިހަށްދުވަހު ކޮންމެވެސް ތާރީހީ ފޮތެއް ނެރުނުތާކު ފާޑަކަށް މާ ނޫންކަމަށް އުޅެނިކޮށް ފެނުނެވެ. ހަނދާން އާކޮއްލަމާ ބަހީ އެވެ. ތާރީހުގެ ފަތްފުއްތައް ހާވައިލާށެވެ. އެދުވަހު ގެންގުޅުއްވި ފޮތުންވެސް ސާފުވާނެއެވެ. ދިވެހީންނަކީ ހިތްވަރު ހުރިބަޔެކެވެ. ކެރޭ ބަޔެކެވެ. ފަސްނުޖެހޭނެ ބަޔެކެވެ. މަރަށް ބިރު ނުގަންނަ ބަޔެކެވެ. ޤައުމަށްޓަކައި ގުރުބާންވާނޭ ބަޔެކެވެ. ކަނޑުގެ ބާޒުން ބަލިކުރި ފަޚްރުވެރިންނެވެ. އެ ދިދައަކަށް އިރު އޮއްސުމެއްނެތް ކަމަށް ޤަބޫލުކުރި ގަދަފަދަ ބަޔަކު މިފަސްގަނޑުން ރޭރުކޮށް ބޭރުކުރި މީހުންނެވެ. ގެރިއްލާ ހަނގުރާމައިގެ “ކިންގުން” ބަލިކުރި މީހުންނެވެ.
ތިޔަ މަލާމާތާއި ފުރައްސާރަ ކުރަނީ ޝަހީދު ހުސައިން އާދަމާއި އެދުވަހު ޝަހީދުވީ ސިފައިންގެ އިތުރު 8 ބޭކަލުންނަށެވެ. އަދި މި ހުރިހާ ޝަހީދުންގެ އާއިލާތަކަށެވެ. މި އުތުރު ފަހުރުވެރިވާ އުތީމް މަހާރަދުންނަށެވެ. ތިކަހަލަގެ، ޤައުމުދެކެ ހިމާރު ކުލުނު ހުރި ވަޒީރުން ގޮވާގެން ޤައުމުގެ ދިފާއުގައި ޝަހީދުވި މި ޤައުމުގެ ޝަހީދުންގެ “ބައްޕަ” އަލީ ރަސްގެފާނަށެވެ. ހިތުގެ ޙާލިސްކަމާއި ހުއްބުލްވަޠަނުގެ ހިތުގެވެރިޔާ، ދޮންބަންޑާރައިންނަށެވެ. އަދި މިހާރުގެ ދިފާޢީ ވަޒީރު “ކަނބިލި” ތަކެއްގެ ގޮތުގައި ސިފަކޮށްދިން ޤައުމުގެ ދިފާޢީ ބާރަށެވެ. ޖުމްލަކޮށް ޤައުމުދެކެ އިންތިހާއަށް ލޯބިވާ ހުރިހާ ދިވެހީންނަށެވެ.
ނިންމާލަމުން ބުނަމެވެ. މި ޤައުމު އަޅުވެތިކަމަށް ބޯނުލަނބާނެއެވެ. މި ޤައުމުގައި ހިނގާނީ ދިވެހި ލެއެވެ. މިނިވަންކަމަށް އެވަގުތަކު ދައްކަން ޖެހުނު އަގެއް ދިވެހީން ދައްކާނެއެވެ. ތާރީޙުން މިކަންކަން ފެންނާނެއެވެ. މި ގައުމުދެކެ ހިމާރު ކުލުނުން ފުރިފައިވާ، ތި ހިތް ހިފާގެން މި ޤައުމުން ދާށެވެ. މިއީ ދިވެހީންގެ، ދިވެހި ޤައުމެވެ.
