ރައްޓެއްސެއްގެ އެހީގައި ސްކޫލު ހޯދައިގެން އިރުމަތި ގޭޓުން އެތެރެއަށް ވަދެ ހުޅަނގަށް ކުޑަ ތަންކޮޅަކަށް ދެވުނުތަނާ ކަނާތް ފަރާތުން ސްކޫލް އޮފީސް ފެނިއްޖެއެވެ. ވަރަށް ޖެހިލުންވެ ހުރެ އޮފީހަށް ވަދެގެން ކުރިއަށް ދިޔައީމެވެ. ވަކި ހިސާބަކުން، ކީއްކުރާ މީހެއްތޯ، އޮފީހުގައި އިން ކުއްޖަކު މަޑު މަޑުން ވަރަށް އަދަބުވެރިކަމާއި އެކު އަހާލިއެވެ. އަހަރެން މިއީ ކާކު ކަމާއި އަދި އައި ބޭނުން ބުނީމަ، ކުރިމަތީ ހުރި ބެންޗުގައި އިށީނުމަށް ޢިޝާރާތް ކޮއްލިއެވެ. އަދި ކުޑަ އިރުކޮޅެއްގެ ތެރޭގައި އަހަރެންގެ މުހުތާދު ހަލާސް ކޮއްދީފިއެވެ. އަލަށް ހަނިމާދޫ ސްކޫލަށް އައި ފުރަތަމަ ދުވަހު މި ބައްދަލުވީ މިހާރު ހުނިޖަހާގެންވެސް ނުހޯދޭނެ ފަދަ މޫނަކާ ކަން އޭރުވެސް ޔަޤީން ކުރެވުނެވެ.
އެއީ ދެހާސް ހަތް ވަނަ އަހަރުގެ މެދުތެރެއެވެ. އެ މޫނު ފެނި ބައްދަލުވި ފުރަތަމަ ފަހަރެވެ. މިވީ ދިގު ތޭރަ އަހަރު ދުވަހު އެމޫނު ނުފެންނަ ދުވަހެއް މަދުވާނެއެވެ. ހުކުރެއް ހޮނިހިރެއް އަދި ރެއެއް ދުވާލެއް ކިޔުމުގެ ބޭނުމެއް ނެތެވެ. މިއަދާއި ހަމައަށް އެމޫނުން، ފެނިގެން ދިޔައީ އެންމެ ފުރަތަމަ ދުވަހު ފެނުނު ހިތްހެޔޮކަމާއި އަދަބުވެރިކަމެވެ. ވާހަކަދެއްކުމުގައި ހުރި ޔަޤީންކަމާއި ސީދާ ސާދާ ކަމެވެ. މިދައްކަނީ ހަނިމާދޫ ސްކޫލް އާއިލާގެ “ބަޖެޓް އޮފިސަރ” އާއިނަތު ޢަލީގެ ވާހަކައެވެ. އައިންތުގެ ޚިދުމަތުގެ ނަވާރަ އަހަރުގެ ތެރެއިން އަހަރެންނަށް ފެނުނު ތޭރަ އަހަރުގެ ވާހަކައެވެ.
ހަނިމާދޫ ސްކޫލުގެ ވަޒީފާގައި ކުޑަ ދުވަސް ކޮޅެއްވީ ތަނާ ވަރަށް ތަފާތުކަމެއް ފާހަގަ ކުރެވިއްޖެއެވެ. އެއީ، ގިނަ މުވައްޒަފުން އައިންތު ދެކެ ޖެހިލުންވާ ކަމެވެ. ބައެއް ޓީޗަރުންގެ ބޭނުންތަކުގައި އޮފީހަށް އަހަރެން ފޮނުވަން ފެށިއެވެ. އޮފީހުން ހޯދަންޖެހޭ ބައެއް ކަހަލަ ސާމާނު ހޯދުމަށެވެ. އޮފީހަށް ގޮސް ރަނގަޅަށް އޮޅުންފިލުވައިދީ އެކަމަކަށް އެދުމުން އެބޭނުމެއް ވަރަށް ފަސޭހަކަމާއި އެކު އައިންތު ހައްލު ކޮއްލަދެއެވެ. އެކި ކަންކަމުގައި އަބަދުވެސް ގޭނި ހުސްވާ މީހަކަަށް ވާއިރު، އަހަރެންނަށް ފާއިތުވި ތޭރަ އަހަރު ދުވަހު މި ކަމުގައި ކުރިމަތިވި ދަތިކަމެއް ނެތެވެ. އަބަދުވެސް ފެނުނީ އައިންތުގެ ޚިދުމަތްދިނުމުގެ، މަރުޙަބާގެ މޫނެވެ. ކޮންމެ ވާހަކައެއްވެސް ޙިއްސާކުރެވޭ އިތުބާރު ހިފޭ މޫނެވެ. ދެގޮތެއްނުވާ ބަދަލުނުވާ ބަސްމަދު މޫނެވެ. ބައެއް ފަހަރު މަޖާކޮށް ސަކަރާތް ޖަހާލުމުން ފެންނަ ފޮޅިފަ އިންނަ މަލެއްފަދަ މޫނެވެ.
މިވީ ދިގު މުއްދަތުގައި ވަރަށް ގިނަ ކަންކަމުގައި ވަރަށް ގާތުން މަސައްކަތް ކުރެވިފައި ހުންނާނެއެވެ. ދެބަސްވެވުނު އެތަކެއް ހާލަތެއްވެސް ކުރިމަތި ވިއެވެ. އެއިން ކޮންމެ ފަހަރަކުވެސް އައިންތު ސާބިތު ކޮއްދެނީ އެއްވެސް ކަމެއް އުސޫލުން ބޭރުން ނުކުރާނެކަމެވެ. ކޮންމެ ކަމެއްވެސް ކުރަންވާނީ އުސޫލުތަކާއި ޤަވާޢިދުތަކުގެ ތަރަހައިގެ ތެރޭގައި ކަމެވެ. ވަޒީފާގެ އިހުލާސްތެރިކަމުގެ ޒައްރެއްގެ މިންވަރުވެސް އަތަކަށް ޖެހިނުލާ ފުރިހަމަ އިސްކޮޅަށް ދެފައި މައްޗަށް އަބަދުވެސް ސީދަލަށް ހުންނާނެކަމެވެ. ކޮންމެ ފަދަ ހާލަތެއްގައިވެސް، ކިތަންމެ މަތިން އެންގި ނަމަވެސް ގަވާއިދާއި އުސޫލުން ބޭރުން ކަތި ފިޔަވަޅެއް ނާޅާނެކަމެވެ.
ކުރަންޖެހޭ އަދި ކުރާ މަސައްކަތާއި ލިބޭ އުޖޫރައަކީ އެއްވަޒީފާއެއްގައި ދިގު މުއްދަތަކަށް ދެމިހުރުމަށް މަގުކޮށާދޭ އަމާޒެވެ. އެކަމަކު، އެޑުމިން އޮފިސަރެއްގެ މަޤާމުގައި އެހައި ކުޑަ ކުޑަ އުޖާރައަކަށް އެހައި ގިނަ ވަގުތާއި އެހައި ގިނަ މަސައްކަތްތާއި އެހައި ގިނަ ޒިންމާއާއި އެހައި ގިނަ ޤުރުބާނީވި އަދި އެހައި ދިގު މުއްދަތަކަށް އިޚްލާސްތެރި ޚިދުމަތެއްކުރި ދެވަނަ ދަރިޔަކު މިފަސްގަނޑުން އަހަރެން ނުދެކެމެވެ.
ސްކޫލުތަކަކީ އެތަކެއް ހަރަކާތްތަކެއް އެއްފަހަރާ އެއްވާނެއްގައި ކޮޅެއް، މެދެއް، ފިންޏެއް، ހޫނެއްނެތި ކުރިއަށްގެންދާ އާދަޔާއި ޚިލާފު ކާރުހާނާތަކެކެވެ. ސްކޫލްތަކަަށް އަހަރު ފަށާ ދުވަހެކޭ އަހަރު ނިމޭ ދުވަހެކޭ ތަފާތެއް ނޯވެއެވެ. ފަރުދާގެ ކުރިމަތިން ފެންނާނީ އަބަދުވެސް އެކްޓަރުންނެވެ. ފަރުދާގެ ނިވަލުގައި މުޅި އަހަރު، ދެގޮތެއް ނުވެ ވާޅުނުވެ އެކްޓަރުން އެކްޓުކުރުވުމުގައި 24 ގަޑި އިރު ހޭދަ ކުރާ މަދު ޑައިރެކްޓަރުންގެ ތެރޭގައި އައިންތު ހިމެނޭނެއެވެ. ފަރުދާގެ ފުރަގަހުގައި ފާއިތުވި ނަވާރަ އަހަރު އައިންތުކުރި މަސައްކަތަށް ޝުކުރު ހައްޤެވެ. ދުވަހަކު މަސައްކަތް ގިނަވެގެން ޝަކުވާ ނުކުރާނެއެވެ. ކޮންމެ މަސައްކަތެއްވެސް ކުރާނީ ހިނިތުންވެ ފޮޅިފައިވާ މޫނަކާއިގެންނެވެ.
ވަޒީފާދެކެ ލޯބިވުމާއި ވަޒީފާ އަދާކުރާ ތަން ދެކެ ލޯބިވުމަކީ ވަރަށް މަދު ބަޔެއްގެ ކިބައިން ފެންނަ ސިފައެކެވެ. އައިންތުއަކީ ހަނިމާދޫ ސްކޫލާއި ވަޒީފާދެކެ އިންތިހާއަށް ލޯބިވާ ފަރާތެކެވެ. ފާއިތުވެދިޔަ ނަވާރަ އަހަރު، އަމިއްލަ ދިރިއުޅުމުގެ އެތަކެއް ކަމަކާއި އާއިލާއާއި އެކުވެރިން އަދި އަމިއްލަ އުފާތައް ޤުރުބާންކުރީ ހަނިމާދޫ ސްކޫލަށާއި ވަޒީފާ އަށެވެ. ސްކޫލު ދެކުނު އެތަކެއް ކުރިއެރުމާއި ކާމިޔާބީއާއި ނާކާމިޔާބެއްގެ ކުރިމަތީ ސާބިތުކަމާއި އެކު އެންމެ ކުރީ ސަފުން ނުފެނުނަސް ފަރުދާގެ ފުރަގަހުގައި އިސް ދައުރެއް ކުޅެނީ އައިންތުއެވެ.
ނަވާރަ މާރިޗު ދެހާސް އެކަކުން ފެށިގެން ފަސްއެނބުރި ބެލުމެއްނެތި ތިޔަ ސާބިތުކޮށް ދެމުންދަނީ ޤައުމީ ޚިދުމަތުގެ ނަމޫނާއެކެވެ. ގަޑި ޖެހުމެއް، ވަރުބަލިކަމެއް، ފޫހިވުމެއް އަދި މަޑުޖެހުމެއް ނެތި ތިދައްކައިދިނީ ޖީލުތަކަށް ދެމިގެން ދާނެ ފަދަ ލާމަސީލު މިސާލެކެވެ. އަދި ތީ އަބަދުމެ ހަނިމާދޫ ސްކޫލުން ފެންނަންޖެހޭނެ މޫނެއްކަމެވެ.
މިއަދު އައިންތު ސްކޫލާއި ވަކިވެގެން ތިޔަ ދަނީ ހަނިމާދޫ ސްކޫލް އާއިލާގެ ކޮންމެ މެންބަރެއްގެ ހިތުގެ ކަނުން ހާއްސަ ޖާގައެއް ހޯދައިގެންނެވެ. ތިޔަ ފަދަ ދެވަނަ އެހެން މުއައްޒަފެއް ނުހުންނާނެކަން ސާބިތުކޮށްދެމުންނެވެ. އަދި ތީ ހަނިމާދޫ ސްކޫލް އާއިލާ ފަޚްރުވެރިވެ، ޝުކުރުވެރިވުން ހައްޤު ދަރިއެއްކަން ދައްކައިދެމުންނެވެ.
އަހަރެން، އަބަދުވެސް އެދެނީ އައިންތުއަށް ކާމިޔާބީއާއި ކުރިއެރުމެވެ. ފާގަތިކަމާއި ފަހިކަމެވެ. އާރޯކަމާއި ދުޅަހެޔޮކަމަށެވެ.
ފޮޓޯ : މުހައްމަދު ނާސިހު
