ސިފައިންގެ މައި މަރުކަޒަށް ހަމަލާދިން ވަގުތު އެމަރުކަޒުގެ މައި ގޭޓުގައި ޓާސްކް ފޯސް ޑިއުޓީގައި ތިއްބެވި ދެބޭކަލުންގެ ތެރެއިން އެއްބޭކަލަކީ ކޯޕްރަލް ހުސެއިން އާދަމް އެވެ.
މި މަގާމުގައި ފިސާރި ސާބިތުކަންމަތީ ހުންނަވައިގެން ކޯޕްރަލް ހުސެއިން އާދަމް ދުޝްމިނުން ދެމުންގެންދިޔަ ބަޑީގެ ނުރައްކާތެރި ހަމަލާތަކުން ސިފައިންގެ މައި މަރުކަޒު ދިފާއުކުރެއްވުމަށްޓަކައި މަސައްކަތްކުރައްވަމުން ގެންދަވަނިކޮށް، އެހަމަލާއިން ކޯޕްރަލް ހުސެއިން އާދަމް ހަށިގަނޑުގެ އެތަން މިތަނަށް ވަޒަން އަރައި ޝަހީދުވި އެވެ.
ކޯޕްރަލް ހުސެއިން އާދަމްއަކީ މިއުދުވާނީ ހަމަލާގެ އެންމެ ފުރަތަމަ ވަގުތުކޮޅުގެ ތެރޭގައި ސިފައިންގެ މައި މަރުކަޒު ދިފާއުކުރެއްވުމުގައި އެންމެ މުހިންމު ދައުރެއް އަދާކުރެއްވި، ކެރުމާއި ހިތްވަރުގަދަ ކަމުގެ ލާމަސީލު ނަމޫނާ ބަތޮލެކެވެ.
އެދުވަހު ޝަހީދު ކޯޕްރަލް ހުސެއިން އާދަމްގެ ހިތްވަރަކީ މިއަދު ކޮންމެ ޒުވާނެއްވެސް ނަމޫނާއަކަށް ބަލަން ޖެހޭ ބޭފުޅެކެވެ. ސިފައިންގެ މައި ގޭޓްއަށް ދުޝްމަނުންގެ ފުރަތަމަ ހަމަލާދޭން ފެށުމުން ރައްދު ހަމަލާ އެންމެ ފުރަތަމަ ދެއްވީ ޝަހީދު ހުސެއިން އާދަމް އެވެ.
ޝަހީދު ހުސެއިން އާދަމްގެ ހިކުމަތްތެރިކަމުގެ އަލީގައި އެވަގުތު އަތުގައި އޮތް 60 ވަޒަން ބޭނުންކުރަމުން ދިޔައީ ސިފައިންނަށް ދުޝްމަނުންނާއި ކުރިމަތިލުމުގެ ގޮތުން ތައްޔާރުވުމަށް ވަގުތު ލިބޭ ގޮތަށެވެ. ޝަހީދު ހުސެއިން އާދަމް ޝަހީދުވެ ލޭތައް ސިފައިންގެ ފާރަށް ބުރައިގެންދިޔަ ވަގުތުވެސް ވިދާޅުވަމުން ގެންދެވީ ވަޒަނެއް ބޭނުންވާ ކަމަށެވެ.
ޝަހީދު ހުސެއިން އާދަމްގެ ސަބަބުން ދުޝަމުންނާއި ކުރިމަތިލުމަށް ތައްޔާރުވުމުގެ ގޮތުން 15 ނޫނީ 20 މިނެޓު ލިބިގެންދިޔަ އެވެ. ޝަހީދު ހުސެއިން އާދަމް އިސްވެ ހަމަލާ ނުދެއްވި ނަމަ ދުޝްމަނުން ސިފައިންގެ ހިފީސްކަން ކަށަވަރެވެ.
ޝަހީދު ހުސެއިން އާދަމް އަޅުގަނޑުމެންނާއެކު ނެތުމުން ގެއްލިގެން އެދިޔައީ ސަކަ މަޖާޒެއްގެ އަހުލާގު ރަނގަޅު ޒުވާނެކެވެ. މައިންބަފައިންނަށް ގެއްލިގެން އެދިޔައީ ގައުމަށް އަގުހުރި ހިދުމަތްތަކެއްކޮށްދެއްވަމުން ގެންދެވި ބަސްއަހާ ކިޔަމަންތެރި ދަރިއެކެވެ.
އެޒުވާނާ މިއަދު ދުނިޔޭގައި ހުންނެވި ނަމަ ސިފައިންގެ މަތީ މަގާމަކުން ފެންނާނެ ކަމާއި މެދު އެކަކު ވެސް ޝައްކެތް ނުކުރާނެ އެވެ. އެޒުވާނާ ލެޔަށްޓަކައި މުޅި ގައުމު ފަޙްރުވެރިވަނީ އެޒުވާނާ ނެތި ދިޔުމުން ކަރުނަ އަޅާ ހާލުގައި އެވެ.
ކޯޕްރަލް ހުސެއިން އާދަމް ޝަހީދުވިއިރު އޭނާ ސިފައިންގެ ހިދުމަތުގައި އުޅުއްވާތާ 4 އަހަރާއި 5 މަހާއި 24 ދުވަސްވެއްޖެ އެވެ.
ކޯޕްރަލް ހުސެއިން އާދަމްގެ ހިތްވަރުގަދަ ގައުމީ ޖިހާދުގެ އަގު ދިވެހި ދައުލަތުން ވަޒަންކުރައްވާ ޕްރައިވެޓެއްގެ މަގާމުން ކޯޕްރަލްގެ މަގާމުގެ ކުރިއެރުންދެއްވާ ހުރަވީ ރަން މެޑަލް އާއި ޖިހާދުގެ ރަތް މެޑަލް އާއި ތިނެއް ނޮވެމްބަރުގެ މެޑަލް ދެއްވާފައިވެ އެވެ.
އުމުރުން 20 އަހަރުގައި ކޯޕްރަލް ހުސެއިން އާދަމް ޝަހީދުވުމުގެ ކުރިން ވެސް ސިފައިންގެ ހިދުމަތުގައި ފާހަގަކޮށްލަންޖެހޭ ފަދަ އިނާމްތަކެއް ލިބިފައިވެ އެވެ.
އެގޮތުން 13 މާޗް 1986 އިން 13 މާޗް 1987 އަށް ގަޑި ނުޖެހި ސަލާމް ބުނުމެއްނެތި އަދި އެއްވެސް މައްސަލައެއް ދިމާނުވެ ޑިއުޓީ އަދާކޮށްފައިވާތީ އެކަމުގެ އިނާމް ލިބިފައެވެ. އަދި 13 މާޗް 1986 އިން 13 މާޗް 1987 އަށް ޕެރޭޑް ހާޒިރީން އެންމެ ރަނގަޅު މީހުންގެ ތެރޭގައި ހިމެނިގެން އިނާމް ލިބިފައިވެ އެވެ.
ހުސެއިން އާދަމް ތައުލީމް ހާސިލްކޮށްފައިވަނީ ހދ.ކުޅުދުއްފުށީ އަމީރު އަމީން ސްކޫލްއިންނެވެ.
ހުސެއިން އާދަމްއަކީ ކުޅުދުއްފުށި އާދަމް މުހައްމަދު (މާވާގެ) އާއި އައިޝަތު ހަސަން (މާވާގެ) އާއި ދެމީހުންނަށް ލިބިފައިވާ ދަރިއެކެވެ. އެދެމަފިރިންގެ ދަރިފުޅަށްޓަކައި މިއަދު މުޅި ދިވެހި ގައުމު ފަޙްރުވެރިވެ އެވެ.
ފުލުހުންގެ މައި މަރުކަޒު ހުންނަ އިމާރާތަކީ ޝަހީދު ހުސެއިން އާދަމް ބިލްޑިންގ ގެ ނަމުގައި ބިނާ ކުރެވުނު އިމާރާތެކެވެ.
މައުލޫމާތު: އެމްއެންޑީއެފްއިން ނެރުނު 3 ނޮވެމްބަރު ފޮތުން
