ސާޖަންޓް މޫސާ އަހުމަދު (ކުޑަނެވި ތުއްތުމަނިކް) ޝަހީދުވީ ސިފައިންގެ ވެރިޔާގެ ނައިބު އަދި މިނިސްޓަރ އޮފް ޑިފެންސް އެންޑް ނެޝަނަލް ސެކިއުރިޓީގެ ނައިބު އޮނަރަބަލް އިލިޔާސް އިބްރާހިމް ހުންނެވި، މއ.ކިނބިގަސްދޮށުގެއަށް ދުޝްމަނުން ހަމަލާދީ އެގޭގައި ހަރަކާތްތެރިވަމުން ދަނިކޮށް، އެގެއަށް ވަންނަވަން މަސައްކަތްކުރައްވަނިކޮށެވެ.
ކިނބިގަސްދޮށުގޭ ދޮރާށި ކުރިމަތިން ދުޝްމިނުން ބަޑިޖަހާ ޝަހީދުކޮށްލި ސާޖަންޓް މޫސާ އަހުމަދަކީ ސިފައިންގެ ވެރިޔާގެ ކާރުކޮޅު ޑްރައިވަރެވެ.
އަދި އެއީ ގައުމީ ސަލާމަތަށް ނުރައްކާތެރި އެމަޖެންސީ ހާލަތެއް ކުރިމަތިވެއްޖެނަމަ ކިނބިގަސްދޮށުގޭގައި ބޭނުންކުރުމަށް ބަހައްޓާފައި ހުރި ހަތިޔާރުތަކުން ބޭނުންކުރުމަށް ކަނޑައަޅުއްވާފައިވާ ހަތަރު ބޭކަލުންގެ ތެރެއިން ބޭކަލެކެވެ.
ތަމަޅަ ހަނގުރާމަވެރިންގެ ތެރެއިން 3 މީހުން ސިފައިންގެ ވެރިޔާގެ ނައިބު ހޯދުމަށް ކިނބިގަސްދޮށުގޭގައި ހަރަކާތްތެރިވަމުން ދަނިކޮށް އެމަނިކުފާނުގެ ކާރުގެ ޑްރައިވަރު ސާޖަންޓް މޫސާ އަހުމަދު ވަރަށް ބާރަށް ސައިކަލްގައި އަތުވެއްޖެ އެވެ.
މިރިޔާސް ގޯޅިން ޒަމާނީ ހިނގުމަށް އައިސް މއ.ޗިޗަންޑާގޭ ފާރު ކައިރީ ސައިކަލް ބަހައްޓާފައި ކިނބިގަސްދޮށުގެއަށް ވަނުމަށްޓަކައި ދުވެފައިދިޔަ ވަގުތު ކިނބިގަސްދޮށުގޭ ދޮރާށިތެރޭގައި ބަޑި ހިފައިގެން ހުރި ރަންޖަން ތުއްތުމަނިކާއި ދިމާލަށް ބަޑި ޖަހައި ޝަހީދުކޮށްލި އެވެ.
އޭނާގެ ގަޔަށް އަރާފައިވާ 3 ވަޒަންގެ ތެރެއިން ދެވަޒަން އަރާފައިވަނީ މޭގެ ދެފަރާތަށެވެ. ތިންވަނަ ވަޒަން އަރާފައިވަނީ ކަނާތްފަރާތުން ތިރިއަށެވެ.
ކިނބިގަސްދޮށުގޭ ސާޖަންޓް މޫސާ އަހުމަދު ވަންނަން ދިޔައީ ސިފައިންގެ ވެރިޔާގެ ނައިބު ދިފާއުކުރެއްވުމަށާއި ގައުމީ ސަލާމަތަށް ނުކުރައްކާތެރި ހާލަތެއް އަތުވެއްޖެ ނަމަ ބޭނުންކުރުމަށްޓަކައި ބަހައްޓާފައިހުރި ހަތިޔާރު ކިނބިގަސްދޮށުގޭގައި ހުންނާނެކަން އިނގޭތީ އެވެ. އެފަދަ ހާލަތެއް އަތުވެއްޖެ ނަމަ ހަތިޔާރު ބޭނުންކުރުމަށޓަކައި ހަމަޖައްސާފައިވާ 3 ބޭކަލުންގެ ތެރޭގައި އޭނާ ހިމެނެ އެވެ.
ކުޑަނެވި ތުއްތުމަނިކު ޝަހީދުކޮށްލުމަށްޓަކައި ޖެހި ބަޑީގެ އަޑު ކިނބިގަސްދޮށުގޭގެ އެތެރެއަށް ވަރަށް ބާރަށް އިވުނެވެ.އެވަގުތު ކިނބިގަސްދޮށުގޭގައި ތިބި ތަމަޅައިގެން ތިން މީހުން އަވަސް އަވަހަށް މަގުމައްޗަށް ނިކުމެ ވެގެން އުޅޭގޮތް އޮޅުން ފިލުވި އެވެ.
ޝަހީދުވެފައި އޮތް ކުޑަނެވި ތުއްތު މަނިކުގެ ގައިން ލޭތައް ފައިބަމުން ދަނިކޮށް ބިންމަތީގައި ދަމާފައި ގެންގޮސް ކިނބިގަސްދޮށުގޭ ގޯތި ތެރެއަށް އޭނާގެ ހަށިގަނޑު ވެއްދީ ޓެރަރިސްޓުންނެވެ.
ނޮވެމްބަރު 3 ގެ އުދުވާނީ ހަމަލާ ކުރިމަތިވުމުން އެއްވެސް ފަސްޖެހުމެއްނެތި ގައުމީ ވާޖިބު އަދާކުރެއްވުމަށާއި ސިފައިންގެ ވެރިޔާގެ ނައިބު ދިފާއުކުރެއްވުމަށް ކިނބިގަސްދޮށުގެއަށް ވަންނަވަން އުޅުއްވަނިކޮށް ދުޝްމިނުން ބަޑިޖެހުމުގެ ސަބަބުން ޝަހީދުވެގެން ވެއްޓިފައިވަނީ މއ.ކިނބިގަސްދޮށުގޭ ކުރިމަތިން ޒަމާނީ ހިނގުމަށެވެ.
ސާޖަންޓް މޫސާ އަހުމަދު ޝަހީދުވިއިރު އޭނާ ސިފައިންގެ ހިދުމަތުގައި އުޅުއްވާތާ 17 އަހަރާއި 3 މަހާއި 18 ދުވަސްވެއްޖެ އެވެ.
ސާޖަންޓް މޫސާ އަހުމަދުގެ މަތިވެރި ހިތްވަރުގަދަ މަސައްކަތް، ދިވެހި ދައުލަތުން ފާހަގަކުރައްވާ ސާޖަންޓެއްގެ މަގާމުން ލެފްޓިނެންޓްގެ މަގާމަށް ޕްރޮމޯޓުކުރައްވާ، ހުރަވީ ރަން މެޑަލް އާއި ތިނެއް ނޮވެމްބަރު މެޑަލް އާއި ޖިހާދުގެ ރަތް މެޑަލް ދެއްވާފައިވެ އެވެ.
(މއ.ކުޑަނެވިގެ) ކުޑަނެވި އާދަމް މަނިކް އާއި މައިމޫނާ އަލީ (މއ.ކުދިރަތްމާގެ) އަށް ލިބިފައިވާ ދަރިއެކެވެ. ތައުލީމް ހާސިލްކުރެއްވީ މަދުރަސަތުލް ސަލާހިއްޔާގައި އެވެ. ޝަހީދުވީ އުމުރުފުޅުން 51 އަހަރުގައި އެވެ.
މައުލޫމާތު: އެމްއެންޑީއެފްއިން ނެރުނު 3 ނޮވެމްބަރު ފޮތުން
