ސިފައިންގެއިން ރެކީ ޕެޓްރޯލްއަށް ނިކުންނެވި 10 ބޭކަލުންގެ ތެރޭގައި ޝަހީދު މުހައްމަދު އިބްރާހިމް ނިކުންނެވީ ކެރިގެން އިސްލާމް ދީނާއި ގައުމުގެ ދިފާއުގައި އެވެ.
ރެކީއަށް ނިކުތުމަށް ނެގި މީހުން ބަޑި ގުދަން ކައިރީ ސަފަކަށް އިށީންދެގެން ތިބިއިރު މޭޖާ މުހައްމަދު ޒާހިރާއި މޭޖާ ޝައުކަތު އިބްރާހިމް ދިޔައީ ކަންތައް ކުރަންވީ ގޮތް ބުނެ ހިތްވަރުދެމުންނެވެ.
އެންމެ ފަހު މީހާއާއި ޖެހެންދެންވެސް އެގޮތުގައި ތިބުމަށް ތަކުރާރުކޮށް މޭޖާ މުހައްމަދު ޒާހިރު ވިދާޅުވަމުން ގެންދެވީ އަސަރާއެކު ފެންކަޅިވެ ހުންނަވައިގެން ގައުމީ ޖޯޝުގައި އެވެ. އެޖޯޝުން ހިތްވަރު ލިބިގަނެ، ޝަހީދު އާދަމް ނަސީރު ވެސް އެކުވެރިން ގައިގައި ބައްދާލައި ސަލާމްކޮށް ހެދި އެވެ.
ބޭރަށް ނިކުންނަން ތައްޔާރުވެފައިވާ މީހުންނަށް އެކަކު އަނެކަކަށް ހެޔޮއެދުމުގެ މަސްތައް ބުނަމުން ގެންދިޔަ އެވެ. އިހްލާސްތެރިކަމާއި އެކު މަސައްކަތްކުރުމަށާއި މިހަނގުރާމައިގައި ކާމިޔާބު ހޯއްދަވާނެ ކަމަށް އެކި ދޫތަކުން ތަކުރާރުކޮށް ކިޔަމުންދިޔަ އެވެ.
ބޭރަށް ނިކުންނަށް ތައްޔާރުވެފައިވާ މީހުންގެ ތެރެއިން ބައެއް މީހުން ވަސިއްޔަތްކުރި އެވެ. މި ދުނިޔެ އާއި ވަކިވުމުގެ ކުރިން ރަށުގައި ނުވަތަ ގޭގައިވާ އަނބިމީހާ އާއި ކުދިންކޮޅަށް ފަހު ބަސް ރައްދުކޮށްދިނުމަށް އެމީހުންގެ ރަހްމަތްތެރިންގެ ގާތުގައި ބުނަމުންދިޔަ އެވެ.
ޝަހީދު މުހައްމަދު އިބްރާހިމް ބުނަމުން ގެންދިޔައީ ހަނގުރާމައިގެ މައިދާން ކިތަންމެ ނުރައްކާތެރިވިޔަސް ދިވެހި ރައްޔިތުންގެ ހައްގުގައިކޮށްފައިވާ ހުވަޔާއި އެއްގޮތަށް ސާބިތުކަންމަތީ ދުޝްމިނުންނާއި ކުރިމަތިލައި ޝަހީދުވިޔަސް ހެޔޮ ކަމަށެވެ.
ޝަހީދު އާދަމް ނަސީރު ނިކުތީ ރެކު ޕެޓްރޯލްއަށް ނިކުންނެވި ދެވަނަ ގްރޫޕްގައި އެވެ. އަދި ސިފައިންގެއިން ނިކުންނެވި 5 ވަނަ މީހާގެ ގޮތުގައި އެވެ.
ޕްރައިވެޓް މުހައްމަދު އިބްރާހިމް ގަޔަށް ވަޒަން އެރުމާއި އެކު ކައިރީގައި އެވަގުތުހުރި އަބްދުﷲ މުފީދަށް ގޮވާލި އެވެ. އެދިމާލަށް އޭނާއަށް ބަލާލެވުނުއިރު މުހައްމަދު އިބްރާހިމް އަރި އަޅާލައިގެން ވެއްޓެނީ އެވެ. ގިނަ އަދަދަކަށް އޭނާގެ ބަނޑާއި ދިމާލުން ލޭ އަންނަމުންދިޔަ އެވެ.
ވެއްޓުމާއިއެކު މުހައްމަދު އިބްރާހިމް އަޅާފައިވާ ބެލްޓުގެ ލޮކް އޭނާ އަމިއްލައަށް ނައްޓުވާލި އެވެ. އެވަގުތު އޭނާގެ އަނބިމީހާއަށާއި ދަރިންނަށް ސަލާމް ރައްދުކޮށްދިނުމަށް އަބްދުﷲ މުފީދުގާތު އެދުނެވެ. އަބްދުﷲ މުފީދަށް އޭނާއަކަށް އެހީތެރިކަމެއް ފޯރުކޮށްދޭނެ ވަގުތެއް ނުލިބުނެވެ. އޭރު އޭނާ އޮތް ހިސާބުގަނޑުގައި ލޭގެ ކޯރެއް ދެމެމުންދިޔަ އެވެ.
ވަޒަން އަރައިގެން ވެއްޓުނުތާ މާގިނައިރުތަކެއް ނުވެ ޕްރައިވެޓް މުހައްމަދު އިބްރާހިމް ޝަހީދުވެ އަޅުގަނޑުމެންނާއި ވަކިވެގެން ހިނގައްޖެ އެވެ. ޝަހީދުވެގެން ވެއްޓިފައި އޮތީ ހުރަވީ ބިލްޑިންގ ގެ ހުޅަނގު އުތުރު ކަންމައްޗަށް، ހުރަވީ ބިލްޑިންގ ގެ މަގުމަތީ ފާރާއި ގާތްގަނޑަކަށް ފޫޓެއްހާ ދުރުމިނަށް ބަންޑުންނެވެ. ބޯކޮޅު އޮތީ އިރުމައްޗަށްވާ ގޮތަށެވެ.
ޕްރައިވެޓް މުހައްމަދު އިބްރާހިމް ޝަހީދުވިއިރު އޭނާ ސިފައިންގެ ހިދުމަތުގައި އުޅުއްވާތާ 8 އަހަރާއި 5 މަސްވެއްޖެ އެވެ. ހުރަވީ ރިހި މެޑަލް، ތިނެއް ނޮވެމްބަރު މެޑަލް، ޖިހާދުގެ ރަތް މެޑަލް، ލިބިފައިވެ އެވެ. ޝަހީދު އިބްރާހިމްއަކީ ހއ.މުޅަދޫ އަނބުގަސްދޮށުގޭ ބޭފުޅެކެވެ. ބައްޕައަކީ އިބްރާހިމް މަނިކެވެ. މަންމައަކީ ހައްވައެވެ.
އުމުރުފުޅުން 31 އަހަރުގައި ޝަހީދު މުހައްމަދު އިބްރާޙިމް އަޅުގަނޑުމެންނާއި ވަކިވެގެންދިޔަ ކަމުގައި ވިޔަސް އޭނާގެ ދަރިން މިއަދު ބައްޕައަށްޓަކައި ފަހްރުވެރިވާނެ އެވެ.
މައުލޫމާތު: އެމްއެންޑީއެފްއިން ނެރުނު 3 ނޮވެމްބަރު ފޮތުން
