ގއ.ވިލިނގިލި، އަލިމަސްގޭ ޝަހީދު އަލްމަރްހޫމް ހަސަން ޒަރީރަކީ އެމްވީ ޕްރޮގްރެސް ލައިޓްގެ ސީމަނެކެވެ.
ނޮވެމްބަރު 3 ވަނަ ދުވަހު މާލެ ބަނދަރުގައި އޮތް މި ބޯޓުގައި ތިބި ފަޅުވެރިންގެ ތެރޭގައި ހިމެނޭ ހަސަން ޒަރީރު ތައްޔާރުވަމުންދިޔައީ ޑިއުޓީ ނިންމުމަށްފަހު ހެނދުނު މާލެއަށް ފޭބުމަށެވެ.
ދުޝްމިނުން މެންދުރު ހަތިޔާރާއެކު ޕްރޮގްރެސް ލައިޓަށް އަރާ ބޯޓުގެ ކެޕްޓަނާއި ފަޅުވެރިންނަށް ބިރުދައްކައި މަޖުބޫރު ކުރުވައިގެން އެމީހުން ބޭނުންވާ ކަންތައްތައް ބޯޓުތެރޭގައި ކުރުވަމުން ގެންދިޔަ އެވެ.
ޝަހީދު އަލްމަރްހޫމް ހަސަން ޒަރީރު ޝަހީދުވީ ޕްރޮގްރެސް ލައިޓްގައި ދުޝްމިނުން ރަހީނުކޮށްގެން ގެންދިޔަ މީހުންނާއެކު ޓެރަރިސްޓުން ފިލަން ދަތުރުކުރަމުން ދަނިކޮށް، ރަހީނުން ސަލާމަތްކުރުމަށްޓަކައި ޕްރޮގްރެސް ލައިޓް ހުއްޓުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ރަހީނުންނާއި އެކު ފިލަން ދުވާތީ އެބޯޓު ހުއްޓުވުމަށްޓަކައި އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސް ލައިޓްއަށްދިން ހަމަލާ ތެރޭގައި ޕްރޮގްރެސް ލައިޓްގައި އެވެ.
ޝަހީދު އަލްމަރްހޫމް ހަސަން ޒަރީރު ޝަހީދުވީ 1988 ނޮވެމަބަރު 6 ވަނަ ދުވަހުގައި އެވެ.
އޭނާ ޝަހީދުވެގެން ވެއްޓިފައި އޮތީ ޕްރޮގްރެސް ލައިޓް ކުރީކޮޅު ޑެކް މަތީގައި އެވެ. ޝަހީދު އަލްމަރްހޫމް ހަސަން ޒަރީރު ޝަހީދުވިއިރު އުމުރަކީ އެންމެ 20 އަހަރެވެ.
މައުލޫމާތު: އެމްއެންޑީއެފްއިން ނެރުނު 3 ނޮވެމްބަރު ފޮތުން
